راولپنڈی: شمالی وزیرستان میں دہشت گردوں کے حملے میں پاک فوج کے کیپٹن سمیت دو اہلکار شہید اور دو زخمی ہو گئے۔
پاک فوج کے شعبہ تعلقات عامہ (آئی ایس پی آر) کے مطابق دہشت گردوں نے شمالی وزیرستان میں سیکیورٹی فورسز کی پٹرولنگ پارٹی پر حملہ کیا۔ جس کے نتیجے میں کیپٹن صبیح اور سپاہی نوید شہید ہو گئے۔
دہشت گردوں سے فائرنگ کے تبادلے میں 2 سپاہی بھی شدید زخمی ہو گئے۔
آئی ایس پی آر کے مطابق دہشت گردوں کی پناہ گاہ کا صفایا کر دیا گیا ہے جبکہ فائرنگ کے تبادلے میں ایک دہشت گرد بھی مارا گیا۔
یہ بھی پڑھیں سیکیورٹی فورسز کا شمالی وزیرستان،مہمند میں آپریشن، 7 دہشت گرد ہلاک
دو ماہ قبل بھی سیکیورٹی فورسز پر دہشت گردوں نے مختلف حملے کیے تھے جس میں تین اہلکار شہید ہوئے تھے جبکہ اس سے ایک ماہ قبل بھی 4 اہلکار شہید ہو گئے تھے۔
