اسلام آباد: وفاقی وزیر سائنس و ٹیکنالوجی فواد چوہدری نے برطانیہ سے سابق وزیر اعظم نواز شریف اور بانی ایم کیو ایم کی حوالگی کا مطالبہ کردیا۔
وفاقی وزیر سائنس و ٹیکنالوجی نے سماجی رابطے کی ویب سائٹ ٹوئٹر پر لکھا کہ برطانوی حکومت نواز شریف اور بانی ایم کیو ایم کو پاکستان کے حوالے کرے یہ ملزمان پاکستان کی عدالتوں کو مطلوب ہیں۔
انہوں نے کہا کہ ان ملزمان کی برطانیہ میں رہائش انصاف کے بنیادی اصولوں کی پامالی ہے۔
برطانیہ کی حکومت نواز شریف اور الطاف حسین کو پاکستان کیلے حوالے کرے، یہ ملزمان پاکستان کی عدالتوں کو مطلوب ہیں اور ان کی برطانیہ میں رہائش انصاف کے بنیادی اصولوں کی پامالی ہے۔
— Ch Fawad Hussain (@fawadchaudhry) July 6, 2020
دو روز قبل ہم نیوز کے پروگرام بریکنگ پوائنٹ ود مالک میں گفتگو کرتے ہوئے وفاقی وزیر برائے سائنس و ٹیکنالوجی فواد چوہدری نے کہا تھا کہ نوازشریف اور آصف زرداری کی پاکستان میں سیاست ختم ہو چکی ہے۔
ان کا کہنا تھا کہ مائنس ون وہاں ہوتا ہے جہاں لیڈر پارٹی سے چھوٹا ہو، جہاں لیڈر پارٹی سے بڑا ہو وہاں مائنس کیسے ہو سکتا ہے۔
ان کا کہنا تھا کہ نواز شریف نے لندن میں بے نامی پراپرٹیز بنائیں مگر انہوں نے کہا یہ اپارٹمنٹ ہمارے نہیں ہیں، جب یہ کیس پاکستان میں شروع ہوا تو پتہ چلا کہ 16 آف شور کمپنیاں بنائی گئیں۔
یہ بھی پڑھیں جہانگیر ترین نے زور لگا کر اسد عمر کو وزارت سے فارغ کرایا تھا، فواد چوہدری
وفاقی وزیر کا کہنا تھا کہ اسلام آباد ہائی کورٹ کے سامنے دو اپیلیں ہیں، دونوں پارٹیاں کہہ رہی ہیں کہ کیس کا ری ٹرائل ہونا چاہیے۔ نواز شریف کو جیل میں رکھنے کا ہمیں شوق نہیں ہے بس ملک کا پیسہ واپس آنا چاہیے، نوازشریف نے ایک روپیہ واپس نہیں کیا اور سب لوگ لندن چلے گئے۔
ان کا مزید کہنا تھا کہ نواز شریف کے خلاف اسکینڈل پاکستان میں نہیں لندن میں بنا اور اب ان کا یہاں کوئی سیاستی مستقبل نہیں ہے۔
