لاہور: مسلم لیگ ن کی ترجمان مریم اورنگزیب نے کہا کہ پنجاب حکومت، یاسمین راشد اور سروسز اسپتال کے ڈاکٹرز سے پوچھیں جنہوں نے درخواست دی نوازشریف کوباہر جانے کی اجازت دی جائے۔
انہوں نے سوال کیا کہ کہ بے روزگار عوام، تباہ حال معیشت، ایک کروڑ نوکری اور 50 لاکھ گھرکب ملیں گے؟ قومی ترقی 5.8 سے منفی 0.4کیسے ہوئی؟ چینی 52 سے 110، آٹا 33 سے 78روپے کلو کیسے ہوا؟
مریم اورنگزیب کا کہنا تھا کہ یہ عوام پی ٹی آئی کے جھوٹ، کرپشن اور دھوکے کی سزا کاٹ کاٹ رہے ہیں۔ انہوں نے کہا کہ کرائے کے ترجمان ٹویٹس کے بجائے تباہ حال معیشت سے متعلق بتائیں۔
ترجمان مسلم لیگ ن مریم اورنگزیب کا کہنا تھا کہ پنجاب حکومت سے پوچھیں جنہوں نے درخواست کی کہ نوازشریف کا علاج پاکستان میں نہیں ہو سکتا، انہیں باہر جانے کی اجازت دی جائے۔
دوسری جانب وفاقی وزیر سائنس و ٹیکنالوجی فواد چوہدری نے سماجی رابطے کی ویب سائٹ ٹوئٹر پر لکھا کہ مسلم لیگ ن کے حمایتی دن رات بتاتے تھے کہ نواز شریف کتنے بیمار ہیں اور اگر نواز شریف کو بیرون ملک نہ بھیجا گیا تو کس طرح ان کی جان کو خطرہ لاحق ہو گا۔
نون لیگ کے لیڈرز اور میڈیا میں ان کے حمائیتی دن رات بتاتے تھے کہ نواز شریف کتنے بیمار ہیں اور اگر نہ بھیجا گیا تو کس طرح ان کی جان کو خطرہ لاحق ہوگا، کل سے یہ حضرات کہ رہے ہیں حکومت نے خود بھیجا تھا،ہم کیسے بلوائیں،یہی وہ دھوکہ دہی اور جھوٹ ہےجس کی بنیاد پر نون لیگ کی تشکیل ہوئ
— Ch Fawad Hussain (@fawadchaudhry) August 23, 2020
فواد چوہدری نے کہا کہ کل سے یہ حضرات کہہ رہے ہیں کہ حکومت نے خود نواز شریف کو بھیجا تھا اب ہم کیسے بلوائیں۔ یہی وہ دھوکہ دہی اور جھوٹ ہے جس کی بنیاد پر مسلم لیگ ن کی تشکیل ہوئی۔
خیال رہے کہ حکومت پاکستان نے سابق وزیراعظم نوازشریف کی حوالگی کیلئے برطانوی حکومت کو خط لکھ دیا ہے۔ برطانیہ میں پاکستانی ہائی کمشنر محمد نفیس زکریا نے سابق وزیر اعظم نواز شریف کی پاکستان کو حوالگی سے متعلق برطانوی حکومت کو خط لکھا ہے۔
نوازشریف کی حوالگی کیلئے خط لکھنے کی خبر سامنے آنے کے بعد حکومت اور ن لیگی ترجمان کی جانب سے بیانات کا تبادلہ ہو رہا ہے۔
سابق وزیراعظم نواز شریف کوعلاج کے لیے چار ہفتے بیرون ملک جانے کی اجازت دی گئی تھی۔ حکومت کا مؤقف ہے کہ نواز شریف کی حیثیت ایک مفرور اور سزا یافتہ شخص کی ہے اور انہیں واپس لانے کیلئے تمام طریقے اختیار کیے جائیں گے۔
