اسلام آباد: پاکستان میں کورونا ویکسین’ کینسینو‘ کے کلینیکل ٹرائل کےتیسرے مرحلے کا آغاز ہوگیا ہے۔
نیشنل کمانڈ اینڈ آپریشن سینٹر کے مطابق ویکسین کا پہلا اور دوسرا مرحلہ چین میں ہوا تھا اور تیسرا پاکستان میں ہورہا ہے۔
معاون خصوصی برائے صحت ڈاکٹر فیصل سلطان نے بتایا کہ ویکسین کاٹرائل صحت کےنظام میں بہتری کےلیے بھی اہم ہے اور کوروناویکسین کا ٹرائل ہمارے لیے اعزاز کی بات ہے۔
انہوں نے بتایا کہ پبلک پرائیویٹ پارٹنر شپ کے تحت قومی ادارہ صحت اور چینی کمپنی مل کرٹرائل کررہے ہیں۔
پاکستان ہیلتھ ریسرچ کونسل کے سربراہ میجر جنرل عامر اکرام کا کہنا تھا کہ 8سے10ہزار رضاکاروں پر ویکسین کاٹرائل ہوگا۔ فیز تھری ٹرائل اہم ہے اس میں حتمی نتیجہ ملے گا۔ ان کا کہنا تھا کہ ٹرائل کامیاب ہونے کے3یا4ماہ بعد ویکسین مارکیٹ میں آجائے گی۔
وفاقی وزیر اسدعمر کا کہنا تھا کہ پاکستان میں کورونا ویکسین کے 3 مرحلہ کا آزمائشی آغاز ہوچکا ہے۔ کورونا ویکسین چینی کمپنی نے تیارکی ہے۔ویکسین ٹرائل میں 7 ممالک کے 40ہزارافراد رضاکارانہ شریک ہوں گے۔
انہوں نے بتایا کہ آزمائشی مرحلے میں 8 سے10 ہزارپاکستانی ہوں گے۔ ٹیسٹ کے ابتدائی نتائج 4 سے 6 ماہ میں متوقع ہیں۔
