اسلام آباد: قومی کرکٹ ٹیم کے سابق کپتان و ملتان سلطانز کے کھلاڑی شاہد آفریدی نے لاہور قلندرز کے تیز گیند باز حارث رؤف سے اپیل کی ہے کہ وہ آئندہ انہیں آہستہ گیند کرائیں۔
سماجی رابطوں کی ویب سائٹ ٹوئٹر سے جاری اپنی پیغام میں انہوں نے لاہور قلندرز کو پاکستان سپر لیگ (پی ایس ایل) 5 کے فائنل تک رسائی پر مبارک باد دی ہے۔
اپنی ٹوئٹ میں انہوں نے حارث رؤف کی تعریف کرتے ہوئے کہا کہ گزشتہ روز انہوں نے بہترین گیند بازی کی، ان کے یارکر کو کھیلنا ناممکن تھا۔
شاہد آفریدی نے کہا کہ وہ کل کراچی کنگز اور لاہور قلندرز کے مابین دلچسپ فائنل دیکھنے کے منتظر ہیں۔
It was a great and unplayable yorker Haris very well bowled! Please bowl slow to me next time ? congratulations to Qalandars for final berth. Look forward to an exciting match tomorrow. Thank you Sultans fans for supporting us throughout the season. https://t.co/GySOxr43ov
— Shahid Afridi (@SAfridiOfficial) November 16, 2020
خیال رہے کہ گزشتہ روز دوسرے ایلیمینٹر میچ میں لاہور قلندرز نے ملتان سلطانز کو شکست دے کر پہلی بار ٹورنامنٹ کے فائنل میں رسائی حاصل کر لی لیکن اس مقابلے کا دلچسپ لمحہ 14ویں اوور کی پانچویں گیند پر دیکھنے میں آیا جب حارث نے آفریدی کو پہلی ہی گیند پر کلین بولڈ کر دیا۔
آفریدی کو آؤٹ کرنے کے بعد حارث رؤف نے جشن منانے کے بعد مسکراتے ہوئے شاہد آفریدی کے سامنے ہاتھ جوڑ لیے جس کا مطلب تھا’مجھے معاف کر دیں‘۔
بعد ازاں ایک ویڈیو پیغام میں حارث رؤف نے بتایا کہ ’شاہد آفریدی سینئر کھلاڑی ہیں اور میں سوچ کر آیا تھا کہ اگر شاہد بھائی کی وکٹ لی تو ایسا کروں گا‘۔
