لاہور: وزیر اعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ حزب اختلاف مانے یا نہ مانے عوام نے فیصلہ سنا دیا ہے۔
وزیر اعلیٰ پنجاب عثمان بزدار کی معاون خصوصی برائے اطلاعات ڈاکٹر فردوس عاشق اعوان نے گلگت بلتستان کے انتخابات میں حزب اختلاف جماعتوں کی شکست پر سماجی رابطے کی ویب سائٹ ٹوئٹر پر تبصرہ کرتے ہوئے کہا کہ شکست تسلیم کرنے کے لیے بھی ظرف کی ضرورت ہوتی ہے۔
انہوں نے کہا کہ بدترین شکست کے بعد حزب اختلاف مانے نہ مانے گلگت بلتستان کی عوام نے فیصلہ سنا دیا ہے اور مسترد شدہ مریم نواز اور بلاول بھٹو زرداری تاریخی شکست پر ماتم کناں ہیں۔
فردوس عاشق اعوان نے کہا کہ کوئی ان کو سمجھائے کہ صرف وہی انتخابات شفاف نہیں ہوتے جس میں آپ جیتیں۔ اب حوصلہ کرو اور ووٹ کو عزت دو۔
شکست تسلیم کرنے کیلئے بھی ظرف کی ضرورت ہے
بدترین شکست کے بعداپوزیشن مانے نہ مانے،GBکے عوام نے فیصلہ عمران خان کے حق میں سنادیاہے!
مستردشدہ راجکماری اور بلاول تاریخی شکست پرماتم کناں ہیں۔کوئی انکوسمجھائے کہ صرف وہی الیکشن شفاف نہیں ہوتاجس میں آپ جیتیں!
اب حوصلہ کرو؛ووٹ کو عزت دو!— Dr. Firdous Ashiq Awan (@Dr_FirdousPTI) November 17, 2020
گزشتہ روز چیئرمین پاکستان پیپلز پارٹی بلاول بھٹو زرادری نے کہا تھا کہ گلگت بلتستان اسمبلی کے انتخابات میں دھاندلی کی گئی، دھاندلی کے خلاف الیکشن کمیشن جائیں گے اور چوری کی گئی سیٹیں واپس لیں گے۔
یہ بھی پڑھیں: جی بی میں چوری کی گئی سیٹیں واپس لیں گے، بلاول
چیئرمین پیپلزپارٹی بلاول بھٹو نے کہا کہ گلگت بلتستان کے عوام کا شکر گزار ہوں۔ گلگت بلتستان کے عوام چاہتے ہیں کہ جمہوریت آگے بڑھے۔ پہلے بھی بتایا تھا کہ پیپلز پارٹی کے خلاف کوششیں جاری ہیں۔ ہم اجازت نہیں دیں گے کہ لڑاوَ اور حکومت کرو کا طریقہ اپنایا جائے۔