لاہور: قومی احتساب بیورو (نیب) لاہور نے پاکستان مسلم لیگ نواز کے رہنما رانا ثناءاللہ کیخلاف 14 کروڑ سے زائد کے اثاثہ جات کے شواہد حاصل کر لیے ہیں۔
نیب دستاویزات کے مطابق لیگی رہنما بطور صوبائی وزیر چار سال میں 26 کروڑ 38 لاکھ 94 ہزار کی جائیدادیں بنائیں۔
نیب دستاویزات کے مطابق 2013 تا 2017 کے درمیان رانا ثناءاللہ نے وزیر قانون پنجاب ہوتے ہوئے 1 سو 68 پلاٹ اور دو فارم ہاوسز خریدے۔
نیب دستاویزات میں دعوی کیا گیا ہے کہ رانا ثناءاللہ کو پانچ مرلے کا گھر اور دس کنال زرعی زمین صرف وراثت میں ملی، انہوں نے اپنی جائیداد کی مالیت 10 کروڑ 98 لاکھ 31 ہزار 500سو ظاہر کی ہے جبکہ حقیقی مالیت 14 کروڑ 67 لاکھ 16 ہزار روپے ہے، چھ پراپرٹیز کی مالیت کا تاحال تعین نہیں ہو سکا ہے۔
مزید پڑھیں: رانا ثنااللہ کی نیب میں پیشی کی وجوہات: تفصیلات سامنے آگئیں
رانا ثناءاللہ نے نیب کی رپورٹ پر ردعمل میں کہا ہے کہ جتنے کروڑ کا الزام لگایا جا رہا ہے، اس سے زیادہ آمدن ہے، تمام اثاثے ظاہر کر چکا ہوں۔
رانا ثناءالل کے مطابق نیب نے پہلے کہا کہ اسٹریلیا میں دو ارب کی جائیدادیں ہیں، وہ بتائیں کہاں ہیں؟ سب اثاثوں کی تفصیلات ریکارڈ پر موجود ہیں۔
خیال رہے کہ نیب نے عدم تعاون پر رانا ثناءاللہ کی گرفتاری کیلئے وارنٹ لاہور ہائیکورٹ میں جمع کروا دیے ہیں جس پر 16 دسمبر کو سماعت ہو گی.
