لاہور: وزیر اعلیٰ پنجاب عثمان بزدار کی معاون خصوصی برائے اطلاعات فردوس عاشق اعوان نے کہا ہے کہ روڈ انفراسٹرکچر، جدید اسپتالوں کے قیام کے منصوبوں سے ترقی آئے گی۔
سماجی رابطوں کی ویب سائٹ ٹوئٹر پر شیئر کیے گئے پیغام میں ان کا کہنا تھا کہ صاف پانی اور نکاسی آب کے منصوبوں سے عوام کا معیار زندگی بہتر ہوگا۔
کپتان کی سیالکوٹ آمد اور سیالکوٹ کے عوام کو تاریخی پیکج دینے پر اہلیانِ سیالکوٹ کیجانب سے وزیراعظم عمران خان کا شکریہ! روڈ انفراسٹرکچر، جدید ہسپتالوں کے قیام، پینے کے صاف پانی اور نکاسی آب سمیت دیگر ترقیاتی منصوبوں سے سیالکوٹ کے عوام کا معیار زندگی بہتر ہوگا۔
— Dr. Firdous Ashiq Awan (@Dr_FirdousPTI) December 10, 2020
فردوس عاشق اعوان نے تحریر کیا کہ وزیر اعظم عمران خان کی سیالکوٹ آمد اور تاریخی پیکج دینے پر مشکور ہوں، دیہی حلقہ کُوبے چَک میں اراضی ریکارڈ سینٹر کا قیام عوام کے مسائل ان کی دہلیز پر حل کرنے کی جانب اہم قدم ثابت ہوگا۔
سیالکوٹ کے دیہی حلقہ کُوبے چَک میں اراضی ریکارڈ سنٹر کا قیام عوام کے مسائل انکی دہلیز پر حل کرنے کیجانب اہم قدم ثابت ہوگا۔ سیالکوٹ کی ترقی کے سفر میں اقبال ؒ کے شاہین اپنے کپتان کے شانہ بشانہ شہرِ اقبال ؒ کی حقیقی ترقی کو یقینی بنائیں گے! #نیاسیالکوٹ_شکریہ_کپتان
— Dr. Firdous Ashiq Awan (@Dr_FirdousPTI) December 10, 2020
انہوں نے لکھا کہ سیالکوٹ کی ترقی کے سفر میں اقبال ؒ کے شاہین اپنے کپتان کے شانہ بشانہ شہرِ اقبال ؒ کی حقیقی ترقی کو یقینی بنائیں گے۔
گزشتہ روز وزیر اعظم عمران خان نے دورہ سیالکوٹ کے دوران شہر کے لیے 17ارب روپے کا پیکج دیا تھا،
وزیر اعظم عمران خان کا کہنا تھا کہ اس شہر کو پانی پارکس اورسیوریج کے منصوبوں کی ضرورت ہے۔
وزیراعظم نے کہا کہ حکومت سیالکوٹ کے تاجروں کی مدد کرے گی، سیالکوٹ کے صنعت کاروں نے اس شہر کو ایکسپورٹ کا حب بنا دیا ہے۔
انہوں نے کہا کہ سیالکوٹ شہر کیلئے جامع منصوبہ مسائل کے حل میں کلیدی کردار ادا کریگا، شہروں کا سیوریج سسٹم بہتر بنانے کی ضرورت ہے،ماسٹر پلان بننے سے شہروں میں صحیح معنوں میں تبدیلی آئے گی۔
وزیراعظم نے کہا کہ صوبے میں عوامی فلاح کیلئے اقدامات پر وزیراعلیٰ پنجاب کو مبارکباد دیتا ہوں،عثمان بزدار بڑے شہروں میں ترقیاتی منصوبے لا رہے ہیں۔