لاہور: پاکستان ڈیموکریٹک موومنٹ کے جلسہ کے بعد پولیس نے دو مقدمات درج کرلیے ہیں۔
کار سرکار میں مداخلت اور سرکاری املاک کو نقصان پہنچانے کے الزام میں25 نامعلوم افراد کے خلاف دو مقدمات درج کر لئے گئے ہیں۔
ایف آئی آرز سیکیورٹی گارڈ یوسف اور ذیشان کی مدعیت میں کاٹی گئی ہی۔ ایف آئی آر تھانہ لاری اڈا میں درج ہے۔
ملزمان پر گیٹ کے تالے توڑ کر پارک میں داخل ہونے،کار سرکار میں مداخلت اور سرکاری املاک کو نقصان پہنچانے کا الزام ہے۔
حکام کا کہنا ہے کہ پاکستان ڈیموکریٹک موومنٹ کے جلسہ کے بعد مینار پاکستان گراونڈ گندگی کے ڈھیر میں تبدیل ہو گیا ہے۔
گراونڈ میں جا بجا ٹوٹی کرسیاں، اسٹیمرز، پارٹی پرچم، بریانی، چائے کے ڈسپوزل کپ اور ڈبے بکھرے ہوئے ہیں۔
صفائی کرنیوالوں کا کہنا ہے گندی اٹھانے میں تین دن اور پارک کا حسن بحال کرنے ایک مہینے سے زیادہ وقت لگ جائے گا۔
پارک کے گرد نصب کئی مقامات پر جنگلے، لائٹس اور دیگر سامان بھی غائب ہے۔ انتظامیہ کا کہنا ہے کہ کارکنوں نے گندگی پھیلا کر پارک کے حسن کو تو روندا اور مینار پاکستان گراونڈ کے دروازے تک توڑ دئیے ہیں۔
خیال رہے کہ گزشتہ روز پی ڈی ایم نے ضلعی انتظامیہ کی اجازت کے بغیر مینار پاکستان پر جلسہ کیا تھا جس میں کارکنوں کی بڑی تعداد نے شرکت کی تھی۔
