پشاور: بی آر ٹی اسٹیشن میدان جنگ بن گیا

بغیر ماسک داخل ہونے سے منع کرنے پر تکرار شروع ہوئی جس کا نتیجہ ہاتھا پائی کی صورت میں نکلا

فوٹو: ہم نیوز


پشاور: خیبرپختونخوا حکومت کا بس ریپڈ ٹرانزٹ(بی آر ٹی) منصوبہ آئے روز بری خبروں کے حوالے سے میڈیا میں رہتا ہے۔

ہم نیوز کے مطابق اس بار بی آر ٹی اسٹیشن پر مسافر اور سیکیورٹی گارڈ کے درمیان جھگڑا ہوا ہے۔ ویڈیو میں ماسک کے بغیر آنے والے شہری کو روکنے پر شہری آپے سے باہر ہو گیا۔

سی سی ٹی وی میں دیکھا جا سکتا ہے کہ مسافر  نے سیکیورٹی گارڈ سے ہاتھا پائی کی۔ بی آرٹی اسٹیشن میں ماسک کے بغیر داخل ہونے کی ممانعت ہے۔

شہری کو بغیر ماسک داخل ہونے سے منع کرنے پر تکرار شروع ہوئی جس کا نتیجہ ہاتھا پائی کی صورت میں نکلا۔

مزید جانیں:بی آر ٹی بس چلتے چلتے رک گئی

گارڈنے  مسافر لڑکے کو ماسک پہننے کی تاکید کی۔ مسافر لڑکے نے سکیورٹی گارڈ سے بدتمیزی کے بعد ہاتھا پائی شروع کر دی۔

موقع پر موجود لوگوں نے بیچ بچاؤ کرایا لیکن معاملہ یہاں نہیں رکا۔ ایف آئی آر کے مطابق ہاتھا پائی کے بعد نوجوان اپنے رشتہ داروں کو بھی لے آیا تھا۔

پولیس کے مطابق سیکیورٹی گارڈ کے ساتھ لڑنے والانوجوان اور ساتھی گرفتار کر لیے گئے ہیں۔ گرفتاری بی آرٹی سیکیورٹی گارڈ کی درخواست پر کی گئی۔

ترجمان بی آر ٹی نے اس واقعہ پر رد عمل دیتے ہوئے کہا ہے کہ بی آر ٹی کے تمام مسافر قابل احترام ہیں مگر ادارے کے قوائد و ضوابط کی پابندی کریں۔

بی آر ٹی سٹاف سے ہرگز بدتمیزی نہ کریں شکایت ہونے کی صورت میں ادارے کی ہیلپ لائن پر کال کریں۔ سٹاف مسافروں کی حفاظت اور رہنمائی پر معمور ہے، انکے ساتھ تعاون کریں۔


متعلقہ خبریں