چار روز قبل شادی کے بندھن میں بندھنے والی بے نظیر بھٹو شہید کی بڑی بیٹی بختاور بھٹو زرداری کی شادی پر ملک بھر سے ان کے لیے نیک خواہشات کا اظہار کیا گیا۔
بختاور کے عروسی ملبوسات اور مہندی کا ڈیزائن سوشل میڈیا پر موضوعِ بحث بنا رہا اور عوام ان کے ذوق کی تعریف کرتے رہے۔
سابق وزیر اعظم بے نظیر بھٹو شہید اور سابق صدر آصف علی زرداری کی بیٹی نے سندھی ثقافت سے پیار کے اظہار کے لیے رسمِ حنا پر اجرک کے ڈیزائن والی مہندی لگوائی۔
ان کے اس عمل نے بہت داد و تحسین وصول کی اور عوام نے بختاور کی اپنی مٹی سے محبت اور کلچر سے پیار کو بہت سراہا۔
آج بختاور بھٹو زرداری نے فوٹو اور ویڈیو شیئرنگ ایپلیکیشن (ایپ) انسٹاگرام پر اپنے رسمِ حنا کے لباس کی تصاویر شیئر کیں۔
View this post on Instagram
بختاور بھٹو زرداری کے دوپٹے پر چند خاص اشعار تحریر تھے جو کہ یہ ہیں
وہ دریا دیس سمندر تھی
جو تیرے میرے اندر تھی
وہ سوندھی مٹی سندھڑی کی
وہ لڑکی لعل قلندر تھی
قیاس کیا جا رہا ہے کہ بختاور نے یہ الفاظ اپنی والدہ محترمہ بے نظیر بھٹو شہید کی یاد میں تحریر کیے تھے۔ قبل ازیں انہوں نے منگنی کے لباس پر بھی اپنی والدہ کی تصویر بنوائی تھی۔
