سربراہ پاکستان ڈیموکریٹک مومنٹ (پی ڈی ایم) مولانا فضل الرحمان نے کہا ہے کہ موجودہ حکومت مکمل طور پر ناکام ہو چکی ہے، دھاندلی زدہ حکومت عام آدمی کے حقوق غصب کر رہی ہے۔
پی ڈی ایم رہنماؤں کے ہمراہ میڈیا سے گفتگو کرتے ہوئے مولانا فضل الرحمان نے کہا کہ حکومت مخالف مہم کے لیے تمام آپشنز کھلے ہیں۔ پی ڈی ایم عوام میں واپس جا رہی ہے اور 4 جولائی کو سوات میں پاور شو کریں گے۔
سربراہ پی ڈی ایم مولانا فضل الرحمان نے کہا کہ ملک معاشی لحاظ سے تباہ ہوچکا ہے، بجٹ میں جھوٹ بولنے کی تیاری مکمل ہے۔ حکومتی اقدامات سے نہیں بلکہ کورونا کی وجہ سے ملنے والی رقم کے باعث معیشت بہتر ہوئی۔
مولانا فضل الرحمان نے کہا کہ چاہتے ہیں کہ اسٹیبلشمنٹ غیر جانبدار ہو، جو ابھی تک نہیں ہورہی ہے۔ کسی ادارے کی مدد سے ہم حکومت کو گھر نہیں بھجوائیں گے۔ حکومت کو عوامی حمایت اور تائید سے گھر بھیجیں گے۔
مزید پڑھیں: پی ڈی ایم کا 4 جولائی سے حکومت مخالف تحریک شروع کرنے کا اعلان
انہوں نے کہا کہ آج بھی مشرف کی پالیسیوں کا تسلسل جاری ہے۔ جس دن اسٹیبلشمنٹ غیر جانبدار ہوئی حکومت گھر چلی جائے گی۔
مولانا فضل الرحمان نے کہا کہ گلگت بلتستان کے بعد آزاد کشمیر کے انتخابات میں بھی مداخلت کی جارہی ہے۔
انہوں نے کہا کہ اگر پیپلز پارٹی اور عوامی نیشنل پارٹی اپنے کیے پر نادم ہیں تو پی ڈی ایم کے دروازے کھلے ہیں۔
