وزیراعظم کے معاون خصوصی شہباز گل نے بتایا ہے کہ اوگرا کی سفارش پر پیٹرول کی قیمت میں فی لیٹر 1.71 روپے کا اضافہ کیا جا رہا ہے۔
انہوں نے بتایا کہ ڈیزل کی قیمتوں میں کسی قسم کا اضافہ نہیں کیا جا رہا۔ ڈیزل کی قیمتوں میں اضافے سے عام آدمی اور کسان زیادہ متاثر ہوتا ہے اس لئے ڈیزل کی قیمتوں میں اضافے کی سمری مسترد کر دی گئی ہے۔
اوگرا کی جانب سے وزارت پٹرولیم کو قیمتوں میں ردو بدل کے حوالے سے سفارشات بھجوائی گئی ہیں۔
یاد رہے کہ جن 27 ممالک میں قیمتیں پاکستان سے کم ہے ان میں سے زیادہ تر ممالک اپنی پٹرولیم مصنوعات میں خود کفیل ہیں- اس وقت پٹرولیم پراڈکٹس پر حکومت پاکستان تقریباً صفر کے قریب ٹیکس وصول کر رہی ہے۔ کرونا کی وجہ سے پوری دنیا مہنگائی کی زد میں ہیں۔
— Dr. Shahbaz GiLL (@SHABAZGIL) July 30, 2021
ذرائع کے مطابق ہائی سپیڈ ڈیزل کی قیمت میں دو روپے ستائیس پیسے فی لٹر کمی کی تجویز دی گئی ہے۔
پٹرول کی قیمت میں ایک روپیہ اکہتر پیسے فی لٹر اضافہ تجویز کیا گیا ہے۔ مٹی کے تیل کی قیمت میں پینتیس پیسے اور لائٹ ڈیزل کی قیمت میں چوبیس پیسے اضافے کی تجویز ہے۔
حتمی فیصلہ وزیراعظم کی مشاورت کے بعد کل کیا جائے گا۔ نئی پٹرولیم مصنوعات کی قیمتوں کا نوٹیفیکشن وزارت خزانہ جاری کرے گی۔ نئی قیمتوں پر عملدرآمد یکم اگست سے ہوگا۔
حکومت نے15 جولائی2021 کو بھی پیٹرول کی قیمت میں 5 روپے 40 پیسے کا اضافہ کیا تھا۔ 5 روپے 40 پیسے اضافے کے بعد پیٹرول کی نئی قیمت 118 روپے 9 پیسے فی لیٹر ہو گئی تھی۔
ڈیزل کی قیمت میں 2.54 روپے فی لیٹر، کیروسین کی قیمت میں 1.39 روپے فی لیٹر اور لائٹ ڈیزل کی قیمت میں 1.27 روپے فی لیٹر اضافہ کیا گیا تھا۔