اسلام آباد پولیس نے مارگلہ ہلز اور شہر کے دیگر تفریحی مقامات کی نگرنی جدید ٹیکنالوجی سے کرنے کا فیصلہ کیا ہے۔
انسپکٹرجنرل پولیس نے ڈرون کیمروں اور بائیسکل پیٹرول یونٹ کے ذریعے تفریحی مقامات کی پیٹرولنگ کی ہدایات جاری کر دی ہیں۔آئی جی نے ایس پی آپریشنز کے ہمراہ ٹریل 5 کا دورہ کیا اور احکامات جاری کیے۔
انسپکٹر جنرل آف پولیس (آئی جی پی) نے سینئر سپرنٹنڈنٹ آف پولیس (ایس ایس پی) (آپریشنز) کو ہدایت کی کہ وہ ان مقامات پر پولیس اہلکاروں کی خصوصی تعیناتی کے ذریعے پیدل سفر کرنے والوں کی حفاظت کو یقینی بنائیں جبکہ ان کی حفاظت کے لیے ڈرون سیکورٹی کیمرے بھی استعمال کیے جائیں۔
پولیس کا کہنا ہے کہ ہائیکنگ کے دوران شہریوں کو سیکیورٹی بھی فراہم کی جائے گی۔ مارگلہ کی پہاڑیوں میں راستہ بھول جانے والوں کو تلاش کرنے اور رہنمائی کیلئے ڈرون کیمروں کا بھی استعمال کیا جائے گا۔
مارگلہ ہلز کے ٹریلز اور اس طرح کے دیگر تفریحی مقامات کی جدید ٹیکنالوجی سے نگرانی کا فیصلہ
آئی جی اسلام آباد کا ایس ایس پی آپریشنز کے ہمراہ ٹریل 5 کا دورہ۔ ڈرون کیمروں اور بائیسکل پیٹرول یونٹ کے زریعے ان مقامات کی پیٹرولنگ کی ہدایات جاری کیں۔#HumSabKaIslamabad #IslamabadPolice pic.twitter.com/XY3ErWohcF
— Islamabad Police (@ICT_Police) August 25, 2021
آئی جی نے ہدایت کی کہ اگر کوئی شخص راستہ بھول جائے تو اس کی نگرانی کی جائے یا اسے ڈرون کیمروں کے ذریعے تلاش کیا جائے اور محفوظ واپسی کو یقینی بنایا جائے۔
ایس ایس پی (آپریشنز) نے کہا کہ آئی جی پی کی ہدایات پر فوری تعمیل کو یقینی بنایا جائے گا اور فوری جواب کے لیے وائلڈ لائف مینجمنٹ بورڈ کے ساتھ ہم آہنگی کے بعد تعیناتی کی جائے گی۔
انہوں نے کہا کہ خواتین ہائیکرز کی رہنمائی اور شہریوں کے محفوظ ماحول کے لیے ہر ممکن کوششوں کے لیے لیڈی پولیس اہلکار بھی تعینات کی جائیں گی۔
