فیصل آباد: وزیر اعظم کے معاون خصوصی شہباز گل نے کہا ہے کہ حکومت غریب عوام کے مسائل حل کرنے پر توجہ دے رہی ہے۔
وزیر اعظم عمران خان کے معاون خصوصی شہباز گل نے میڈیا سے گفتگو کرتے ہوئے کہا کہ ہم نے ترقیاتی کاموں پر توجہ مرکوز رکھنی ہے جبکہ ہم نے 3 سال میں بہترین کام کیے اور آگے بھی جاری رکھیں گے۔
انہوں نے کہا کہ وزیر اعظم نے غریب لوگوں کا سوچا اور ان کے لیے کام کیا لیکن نواز شریف خاندان سمیت ملک سے باہر ہیں اور سابق صدر آصف علی زرداری بھی خاندان سمیت دبئی میں ہوتے ہیں۔
شہباز گل نے کہا کہ نواز شریف اور آصف علی زرداری نے کتنے بیرون ملک دورے کیے ؟ لیکن ریاست مدینہ کی بات کرنے پر وزیر اعظم کو تنقید کا نشانہ بنایا گیا۔
انہوں نے کہا کہ ہم نے روزگار فراہم کیا اور آپ لوگوں نے چھینا، اسی طرح حکومت نے کوئی بھوکا نہ سوئے پروگرام شروع کیا جبکہ عمران خان نے غریب کو سونے کے لیے چھت فراہم کی۔
یہ بھی پڑھیں: افغانوں نے ہمارے مشور ے نہ مانے، اب ہی بات مان لیں، فواد چودھری
معاون خصوصی نے کہا کہ آصف علی زرداری نے 134 غیرملکی دورے کیے اور ان دوروں پر کروڑوں روپے لگائے۔ نواز شریف نے 23 غیرملکی دورے کیے۔
انہوں نے کہا کہ نواز شریف کا سارا خاندان لندن اور آصف زرداری کا دبئی میں ہے لیکن حکومت غریب عوام کے مسائل حل کرنے پر توجہ دے رہی ہے۔
