لاہور: چیئرمین پاکستان کرکٹ بورڈ (پی سی بی) رمیز راجہ نے انگلینڈ کرکٹ ٹیم کی جانب سے پاکستان کے دورے کی منسوخی پر مایوسی ہوئی ہے۔ ان کا کہنا تھا کہ ضرورت کے وقت ساتھی کرکٹ بورڈ کا ساتھ نہ دینے پر وہ افسردہ ہیں۔
انگلینڈ کرکٹ بورڈ نے دورہ پاکستان ملتوی کردیا
انہوں نے انگلش کرکٹ ٹیم کے دورہ پاکستان کو ملتوی کیے جانے کے فیصلے پر اپنا ردعمل سماجی رابطوں کی ویب سائٹ ’ٹوئٹر‘ پر پہلے جاری کیا اور اس کے بعد تفصیلی ویڈیو پیغام بھی دیا۔
یہ امر حیران کن ہے کہ رمیز راجہ کے چیئرمین پی سی بی منتخب ہونے کے بعد نیوزی لینڈ اور انگلینڈ کی کرکٹ ٹیموں نے اپنے طے شدہ دورے منسوخ کیے ہیں۔ یاد رہے کہ نیوزی لینڈ کی کرکٹ ٹیم تو پاکستان آنے کے بعد واپس گئی ہے۔
Disappointed with England, pulling out of their commitment & failing a member of their Cricket fraternity when it needed it most. Survive we will inshallah. A wake up call for Pak team to become the best team in the world for teams to line up to play them without making excuses.
— Ramiz Raja (@iramizraja) September 20, 2021
چیئرمین پی سی بی رمیز راجہ نے اپنے ردعمل میں کہا ہے کہ انگلینڈ کے دورہ پاکستان سے دستبردار ہونے سے مایوسی ہوئی ہے اور انگلش ٹیم کی جانب سے کمٹمنٹ پوری نہ کرنے پر افسوس بھی ہے۔ انہوں نے اپنے پیغام میں کہا کہ پاکستان دنیا کی بہترین نمبر ون ٹیم بن گئی توکھیلنے کے لیے ٹیموں کی لائن لگ جائے گی۔
نیوزی لینڈ کھیلنے پر راضی، اب پاکستان نہ مانا
انہوں نے کہا کہ ہمارے لیے یہ ویک اپ کال ہے کہ ہم نے دنیا کی بہترین ٹیم بننا ہے اور ہم نے کوئی جواز دیے بغیر سب کے خلاف بہترین ٹیم بن کر کھیلنا ہے۔ انہوں نے کہا کہ ہم انشا اللہ زندہ رہیں گے۔
پی سی بی کے نو منتخب چیئرمین رمیزراجہ نے کہا کہ یہ قومی ٹیم کے لیے دنیا کی بہترین ٹیم بننے کا موقع ہے۔انہوں نے واضح کیا کہ اب ہم وہاں جائیں گے جہاں ہمارا مفاد ہو گا۔ انہوں نے کہا کہ ہم پاکستان میں کرکٹ کی بحالی چاہتے ہیں۔
رمیز راجہ نے کہا کہ ہماری سکیوریٹی ایجنسیز دنیا میں سب سے زیادہ بیٹل ہارڈن ہیں اور دنیا جانتی ہے کہ ہماری سکیورٹی ایجنسیز کس معیار کا کام کرتی ہیں؟ انہوں ںے کہا کہ ان سے بھی کچھ شیئر نہ کریں جہاز پکڑیں اور نکل جائیں تو پہلے یہ دھچکہ لگا۔ ان کا کہنا تھا کہ یہ ہمارے لیے سبق بھی ہے کیونکہ ہم ان کے لیے آوٹ آف دی وے جا کر ساتھ دیتے ہیں۔
ہم نیوز کے مطابق چیئرمین پی سی بی نے کہا کہ ہم ان کی خواہشات کو سرآنکھوں پر رکھتے ہیں اورہم بہترین میزبان ہیں لیکن جب ہم ان کے ملک جاتے ہیں تو یہ قرنطینہ میں ہمارے کھلاڑیوں کو ڈانٹ ڈپٹ بھی کرتے ہیں۔
سابق ٹیسٹ کرکٹر اور قومی ٹیم کے سابق کپتان رمیز راجہ نے کہا کہ مصیبت میں کرکٹ کے حلقوں کو ایک دوسرے کے کام آنا چاہئے۔ انہوں نے کہا کہ گلہ کس سے کریں؟ یہ تو اپنے تھے، لیکن انہوں نے ہمیں اپنا سمجھا نہیں۔
انہوں نے دعویٰ کیا کہ یہ نہ کھیلنے کے بہانے ڈھونڈتے ہیں تاہم ان کا کہنا تھا کہ اگر ہماری کرکٹ اکنامی بڑی ہوتی تو یہ کبھی منع نہ کرتے۔ انہوں نے کہا کہ افسوس اس بات کا ہے کہ ہم سمجھ رہے تھے کہ انگلینڈ ہماری مدد کو آئے گا۔
نیوزی لینڈ، انگلینڈ میں بھی حملے ہوتے ہیں، ڈیرن سیمی
رمیز راجہ نے خبردار کرتے ہوئے کہا کہ کرکٹ کے حلقوں میں اگر ہمیں اس طرح بلاک کیا جائے گا تو آگے چل کر ہم بھی لحاظ نہیں کریں گے۔ انہوں ںے کہا کہ نیوزی لینڈ کی جانب سے دورہ ختم کرنے کے معاملے پر ہماری خط و خطابت جاری ہے۔
چیئر مین پی سی بی نے دعویٰ کیا کہ میں نیوزی لینڈ کرکٹ بورڈ سے ہرجانہ لے کر رہوں گا۔ انہوں نے کہا کہ ورلڈکپ میں پہلے نشانے پر ایک ٹیم تھی اب اس میں دو ٹیمیں اور شامل کرلیں۔ انہوں نے اس عزم کا بھی اظہار کیا کہ ہم اب عزت کے ساتھ کرکٹ کھیلیں گے اورعزت کے ساتھ ٹیموں کو بلائیں گے۔
انگلینڈ کرکٹ بورڈ نے دورہ پاکستان ختم کردیا ہے۔ انگلینڈ کرکٹ بورڈ نے اپنی مینز اور ویمنز ٹیمیں پاکستان بھیجنے سے انکار کردیا ہے۔
نیوزی لینڈ کی اتنی فوج نہیں جتنی ان کی ٹیم کو سیکورٹی دی، شیخ رشید
گزشتہ دنوں نیوزی لینڈ کی ٹیم نے ٹاس سے کچھ دیر قبل دورہ پاکستان منسوخ کرنے کا اعلان کیا تھا۔
