ٹوکیو: جاپان میں دو جڑواں بہنوں کو زندگی کے 107 سال اور 300 دن پورے کرنے پر دنیا کی سب سے عمر رسیدہ جڑواں کا خطاب دے دیا گیا ہے۔
یومینو سومی یاما اور کومے کوڈاما نے اس سے پہلے جاپان کی ہی دو جڑواں بہنوں کا ریکارڈ توڑا ہے۔ دونوں بہنوں کی پیدائش 5 نومبر 1913 کو شودوشیما جزیرے پر ہوئی تھی۔
یہ بھی پڑھیں: 80 سال بعد کسی ہاتھی کے جڑواں بچوں کی پیدائش
دونوں بہنوں کو عمر رسیدہ لوگوں کے ساتھ عزت و احترام کا مظاہرہ کرنے والے دن پر یہ اعزاز دیا گیا۔
کورونا کے خطرے کے باعث احتیاطی تدابیر اپناتے ہوئے دونوں بہنوں کو گنیز ورلڈ ریکار کی جانب سے اسناد ان کی رہائش پر بھیجی گئیں۔
دونوں بہنیں جاپان کے مختلف حصوں میں الگ الگ نگہداشت گھروں میں رہتی ہیں۔
پچھلے ریکارڈ ہولڈرز کن اور جن کے پاس یہ اعزاز جنوری 2000 سے تھے جب 107 سال اور 175 دن کی عمر میں انھیں سب سے معمر جڑواں بچوں کا خطاب ملا تھا۔
یہ بھی پڑھیں: کرسٹیانو رونالڈو کا نام گنیز بک آف ورلڈ ریکارڈ میں درج
کن کی موت 2000 میں ہی ہوئی جس کے اگلے سال ہی 108 سال کی عمر میں جن انتقال کر گئیں۔
خیال رہے کہ جاپان میں عمریں اوسطا سب سے طویل ہین اور وہاں معمر لوگوں کا بہت احترام کیا جاتا ہے۔
گنیز ورلڈ ریکارڈ کے مطابق سب سے معمر زندہ شخص کا تعلق بھی جاپان سے ہے اور وہ 118 سالہ جاپانی خاتون کین ٹاناکا ہیں۔
