انگلینڈ اور نیوزی لینڈ کا دورہ پاکستان منسوخ ہونے آسٹریلیوی کرکٹرعثمان خواجہ بھی پاکستان کے حق میں بول پڑے۔
نیوزی لینڈ اور پھر اس کے بعد انگلینڈ کی جانب سے دورہ پاکستان کو منسوخ کیے جانے کو انہوں نے مایوس کن قرار دیا۔
آسٹریلوی کرکٹر کا کہنا تھا کہ پاکستان کے دوروں کو ختم نہیں کرنا چاہیے، کرکٹ کے لحاظ سے یہ صورتحال انتہائی مایوس کن ہے۔
ساتھ میں انہوں نے بین الاقوامی کرکٹ کو تنقید کا نشانہ بناتے ہوئے کہا کہ بھارت میں بھی یہی صورتحال ہو تو بھارت کو کھیلنے سے کوئی منع نہیں کرے گا۔
ان کا کہنا تھا کہ پیسا بولتا ہے اور غالباً یہی اس کی سب سے بڑی وجہ ہے۔
آسٹریلیا کو پاکستان کا مکمل دورہ کرنا چاہئے، عثمان خواجہ
عثمان خواجہ نے کہا کہ پاکستان نے ایونٹس کے انعقاد سے ثابت کیا ہے کہ وہ محفوظ جگہ ہے، پاکستان میں سخت سیکیورٹی کے انتظامات کیے جاتے ہیں۔
اسلام آباد میں پیدا ہونے والے عثمان خواجہ اس وقت آسٹریلیا میں نا صرف مقیم ہیں بلکہ آسٹریلوی کرکٹ ٹیم کا اہم ترین حصہ بھی ہیں۔
واضح رہے کہ آئی سی سی کے فیچور ٹور پروگرام کے تحت آسٹریلیا نے اگلے سال فروری میں پاکستان کے خلاف دو ٹیسٹ، تین ون ڈے اور تین ٹی ٹوئنٹی پر مشتمل سیریز کھیلنی ہے۔
