اسلام آباد: ڈاکٹر عبدالقدیر خان کی آخری دستخط شدہ پٹیشن سماعت کے لیے مقرر کر دی گئی۔
اسلام آباد ہائی کورٹ نے ڈاکٹر عبدالقدیر خان کی آخری دستخط شدہ پٹیشن منگل کو سماعت کے لیے مقرر کی ہے۔ ہائی کورٹ کے جسٹس بابر ستار درخواست پر سماعت کریں گے۔
درخواست میں پی ایم سی کے کنڈکٹ آف ایگزامنیشن ریگولیشن 2021 کو کالعدم قرار دینے کی استدعا کی گئی ہے اور درخواست میں کہا گیا ہے کہ ینگ ڈاکٹرز پر پولیس کے لاٹھی چارج سے دنیا بھر میں ایٹمی پاکستان کا امیج خراب ہوا۔
درخواست میں مؤقف اختیار کیا گیا کہ طلبا کو مناسب وقت دیے بغیر امتحان کا نیا سسٹم متعارف کرانا درست نہیں اور آئین پاکستان کے تحت طلبا کو میرٹ پر اعلیٰ تعلیم کی سہولت ملنی چاہیے۔
یہ بھی پڑھیں: تحریک انصاف کی نااہلی تاریخ کا حصہ بن چکی، مولانا فضل الرحمان
ایڈووکیٹ وقاص ملک نے عبدالقدیر خان کی درخواست ان کی وفات کے بعد خود دائر کی تھی جبکہ ڈاکٹر عبدالقدیر خان نے جمعہ کو درخواست کے لیے وکالت نامے پر دستخط کیے تھے۔
وقاص ملک ایڈووکیٹ نے کہا کہ ڈاکٹر عبدالقدیر خان نے ینگ ڈاکٹرز کے لیے پٹیشن دائر کرنے کی ہدایت کی تھی۔
