روم: اٹلی میں بیوی سے تنگ شخص پولیس اسٹیشن پہنچ گیا اور جیل جانے کی درخواست دے دی۔
غیر ملکی خبر رساں ایجنسی کے مطابق اٹلی میں منشیات کیس کے مجرم کو گھر میں نظر بندی کی سزا سنائی گئی تھی تاہم مذکورہ شخص بیوی سے تنگ ہو کر تھانے پہنچ گیا اور درخواست جمع کرا دی کہ اسے گھر کے بجائے جیل میں رکھا جائے کیونکہ گھر میں بیوی کے ساتھ زندگی گزارنا مشکل ہو گیا ہے۔
پولیس کے مطابق منشیات کیس کا مجرم گھر سے بھاگ کر تھانے پہنچا اور اپنی باقی کی سزا جیل میں گزرنے کی درخواست کی۔ سزا یافتہ شخص کا کہنا تھا کہ وہ اب اپنی بیوی کے ساتھ ’جبری ہم آہنگی‘ قائم نہیں رکھ سکتا اوراسی لیے گھر سے بھاگنے کو ترجیح دی۔
پولیس کا کہنا ہے کہ گھر سے بھاگ کر تھانے آنے والا شخص گزشتہ کئی ماہ سے منشیات کے کیس میں سزا پانے کے بعد گھر میں نظر بند تھا اور اپنی بیوی اور خاندان کے ساتھ رہ رہا تھا۔
یہ بھی پڑھیں: سرکاری جادو گر نوکری سے فارغ
پولیس کے مطابق مذکورہ شخص کی رہائی میں کچھ سال باقی تھے لیکن اس نے بتایا کہ میری گھریلو زندگی جہنم بن چکی ہے اور میں اب گھر میں ںظر بند نہیں رہ سکتا۔
پولیس نے مذکورہ شخص کو نظربندی کی خلاف ورزی کے کیس میں گرفتار کر کے عدالت میں پیش کیا جہاں عدالت نے اسے جیل منتقل کرنے کا حکم دے دیا۔
