بیجنگ: افغانستان سے چین پہنچنے والے 26 ٹن چلغوزے چند منٹوں میں ہی فروخت ہو گئے۔
غیر ملکی خبر رساں ایجنسی کے مطابق چین برآمد ہونے والے 26 ٹن چلغوزے آن لائن فروخت کیے گئے۔ چین افغانستان سے سینکڑوں ٹن چلغوزے درآمد کر چکا ہے اور وہاں چلغوزوں کی طلب میں بےتحاشہ اضافہ ہو گیا ہے۔
افغانستان کی نئی حکومت نے اپنی معیشت کو مضبوط کرنے کے لیے چلغوزوں کا بھی سہارا لیا جس کے لیے باقاعدہ چین سے مزاکرات کیے گئے تھے اور چینی حکومت کی منظوری کے بعد بڑی تعداد میں چلغوزوں کی افغانستان سے درآمد شروع ہو گئی۔
چینی مارکیٹ میں افغانستان سے برآمد شدہ چلغوزوں کی طلب مزید بڑھ گئی ہے اور افغانستان میں چینی سفیر وانگ یو نے سماجی رابطے کی ویب سائٹ ٹوئٹر پر لکھا کہ افغانستان سے اب تک چلغوزوں کی 10 فلائٹس چین پہنچ چکی ہیں جبکہ 26 ٹن چلغوزے چند منٹوں میں ہی آن لائن فروخت ہو گئے۔
Till today 10 flights of Afg pinenuts flew to China. Remember 26 tons were sold in China on line in just few minutes. Flights will be continue flying. Dry fruits next priority.China will unswervingly expand opening-up,and share its development opportunities with Afg & wider world pic.twitter.com/uqE1XnBklM
— Wang Yu 王愚 (@ChinaEmbKabul) November 20, 2021
انہوں نے لکھا کہ چلغوزوں کے بعد ہماری اگلی ترجیح افغانستان سے ڈرائی فروٹ کی بھی تجارت ہے۔
گزشتہ دنوں قطر میں افغان وزیر خارجہ نے چینی وزیر خارجہ کو چلغوزوں کا تحفہ بھی پیش کیا تھا جس کے بعد چین اور افغانستان میں باقاعدہ چلغوزوں کی تجارت شروع ہو گئی۔
