پشاور: خیبرپختونخوا کے دارالحکومت پشاورمیں خیبر میڈیکل کالج کے طلبا نے ہاسٹل سے بیدخلی کے خلاف دوسرے روز بھی دھرنا جاری رکھا ہے۔
ہم نیوز کے مطابق خیبر میڈیکل کالج کے احتجاج کرنے والے طالب علموں کا کہنا ہے کہ ہاسٹل سے بے دخلی کسی صورت منظور نہیں، مطالبات پورا ہونے تک دھرنا جاری رکھیں گے۔
طلبہ کا موقف ہے کہ ان کا تعلق دوردراز اور گرم علاقوں سے ہے، گرمیوں کی چھٹیوں میں گھروں کو جانا اور وہاں آئندہ تعلیمی مراحل کے لئے تیاری کرنا آسان نہیں ہے۔
طلبہ کے مطابق آبائی علاقوں میں 16 تا 18 گھنٹے کی لوڈشیڈنگ میں میڈیکل کی مشکل پڑھائی ناممکن ہے۔ اس کے باوجود ہاسٹل ڈین ہماری بات کو اہمیت نہیں دے رہا۔
خیبرمیڈیکل کالج کے طلبہ نے متنبہ کیا کہ اگر گرمیوں کی چھٹیوں کے دوران ہاسٹل میں رہائش کی اجازت نہ ملی تو پورا رمضان دھرنے میں گزار دیں گے۔
کے ایم سی کے نام سے معروف طبی درس گاہ میں چار ہاسٹل ہیں، تین مرد طالب علموں جب کہ ایک طالبات کے لئے مخصوص ہے۔ ہاسٹل انتظامیہ کا کہنا ہے کہ گرمائی تعطیلات کی وجہ سے ہاسٹلز بند کیے جا رہے ہیں۔