فرانسیسی صدر ایمانوئیل میکرون کی پارٹی نے پارلیمنٹ میں اکثریت کھو دی۔
فرانس میں ہونے والے پارلیمانی انتخابات میں فرانسیسی صدرایمانوئیل میکرون نے اکثریت کھو دی ہے ۔ انتخابات کے دوسرے راؤنڈ کے نتائج نے فرانس کی سیاست میں ہلچل مچا دی ہے۔
پارلیمنٹ میں اب بھی صدر میکرون کی پارٹی سب سے بڑی پارٹی ہوگی تاہم وزارت داخلہ کے مکمل نتائج کے مطابق اس کے پاس 245 نشستیں ہیں جو 577 رکنی چیمبر میں اکثریت کے لیے درکار 289 نشستوں سے بہت کم ہیں۔
پارلیمنٹ میں اکثریت برقرار رکھنے کے لیے صدر میکرون کی پارٹی کو 289 سیٹیں درکار ہیں۔اکثریت حاصل کرنے کے لیے صدرمیکرون کو نئےاتحادیوں کی ضرورت ہوگی۔
فرانسیسی وزیراعظم الزبتھ بورن نے کہا ہے کہ حکمران جماعت فوری طور پر نئے اتحادیوں کو تلاش کرے گی۔ ہم اکثریت بنانے کے لیے کل سے کام شروع کریں گے۔پارلیمانی انتخابات کے نتائج ملک کے لیے خطرناک ہیں۔
صدارتی ترجمان نے کہاہے کہ صورتحال مایوس کن ہے، الیکشن کے نتائج ہماری توقعات کے برعکس ہیں۔ ماہرین کا کہنا ہے کہ اگر صدر کی پارٹی اتحادی بنانے میں ناکام رہتی ہے تو یہ صورتحال صدر میکرون کو سیاسی طور پر مفلوج کردے گی۔
واضح رہے کہایمانوئیل میکرون رواں سال اپریل میں اپنی حریف ماری لاپین کو واضح شکست دے کر مزید پانچ برس کے لیے فرانس کے صدر منتخب ہوئے تھے۔
