اسلام آباد: پاکستان تحریک انصاف کے مرکزی رہنما سینیٹر فیصل جاوید کا کہنا ہے کہ عمران خان نے 90 روز میں کرپشن ختم کرنے کا کہا تھا اور اس پر عمل بھی کیا۔
جمعرات کے روز ہم نیوز کے مارننگ شو ‘صبح سے آگے‘ میں گفتگو کرتے ہوئے پی ٹی آئی رہنما کا کہنا تھا کہ آئندہ عام انتخابات میں ان کی جماعت تحریک انصاف کی ہی جیت ہوگی۔
پارٹی معاملات اور سربراہ کا ذکر کرتے ہوئے انہوں نے کہا کہ عمران خان ناممکن کو ممکن بنا سکتے ہیں۔ فیصل جاوید نے دعوی کیا کہ پاکستان میں دیانت دار حکومت تحریک انصاف ہی بنا سکتی ہے۔
تحریک انصاف سربراہ کی جانب سے آئندہ حکومت بنانے کی صورت میں 100 روزہ منصوبے پر گفتگو کرتے ہوئے انہوں نے خیبرپختونخوا حکومت کی کارکردگی کا بھی ذکر کیا۔
سینیٹر فیصل جاوید کا کہنا تھا کہ خیبرپختونخوا میں صحت اور تعلیم کے شعبوں کے لیے مختص کردہ بجٹ کی پوری مقدار استعمال کی گئی ہے۔ کے پی میں تعلیم کا معیار بہتر بنانے کے لیے خاصے اقدامات کیے گئے ہیں۔
فیصل جاوید کا کہنا تھا کہ صوبے میں پولیس غیر سیاسی ہے جس کا اعتراف سب کرچکے ہیں، صحت کے لیے ہیلتھ کارڈ کا متعارف کروایا جانا ایک مثال ہے۔
ہم نیوز کے مارننگ شو ‘صبح سے آگے‘ میں سابق صداکار اور اشتہاریات کے پیشے سے وابستہ فیصل جاوید نے تحریک انصاف کے آئندہ کے لائحہ عمل پر بھی بات کی۔
پیپلزپارٹی اور ن لیگ کے درجنوں رہنما گزشتہ کچھ عرصہ میں پی ٹی آئی کا حصہ بنے ہیں جس کے بعد عام انتخابات 2018 کے لئے تحریک انصاف کی انتخابی مہم میں مزید تیزی آئی ہے۔
پاکستان میں انتخابی کمیشن نے آئندہ انتخابات کی تاریخوں کے تعین کے لیے سمری تیار کر لی ہے۔ 25 تا 27 جولائی میں سے کسی تاریخ کے انتخاب کے لیے سمری جلد صدر مملکت کو بھجوائی جائے گی۔
