اسلام آباد: ادارہ شماریات کے مطابق ایک ہفتے میں 32 اشیائے ضروریہ کی قیمتوں میں اضافہ ریکارڈ کیا گیا ہے۔
ادارہ شماریات نے ہفتہ وار مہنگائی کے اعدادوشمار جاری کر دیئے۔ جس کے مطابق ایک ہفتے میں مہنگائی میں 1.01 فیصد اضافہ ریکارڈ کیا گیا اور ایک ہفتے میں مہنگائی کی مجموعی شرح 28.05 فیصد تک پہنچ گئی۔
دال ماش کی فی کلو قیمت میں 12 روپے 77 پیسے تک کا اضافہ ہوا جبکہ فی درجن انڈے 7 روپے 19 پیسے مہنگے ہوئے۔ برانڈڈ گھی فی کلو 21 روپے تک مہنگا ہوا اور دال مسور کی فی کلو قیمت میں 11 روپے تک اضافہ ہوا۔
یہ بھی پڑھیں: مہنگائی سے تنگ عوام کیلئے اب دالوں کا حصول بھی مشکل
ایک ہفتے میں 32 اشیائے ضروریہ کی قیمتوں میں اضافہ ریکارڈ کیا گیا اور ایک ہفتے میں پیاز کی فی کلو قیمت میں 4 روپے 9 پیسے اضافہ ہوا۔ دال مونگ 9 روپے 2 پیسے مہنگی ہوئی۔
5 لیٹر کوکنگ آئل ایک ہفتے میں 122 روپے تک مہنگا ہوا اور 5 لیٹر کوکنگ آئل کی قیمت 2 ہزار 770 روپے تک پہنچ گئی۔ ایک ہفتے میں 4 اشیا کی قیمتوں میں کمی ہوئی اور 15 اشیا کی قیمتوں میں استحکام رہا۔
