راولپنڈی: پاکستانی خفیہ ایجنسی انٹرسروسز انٹیلی جنس (آئی ایس آئی) کے سابق ڈائریکٹرجنرل لیفٹیننٹ جنرل (ر) اسد درانی کی حالیہ کتاب پر پاک فوج نے تحفظات کا اظہار کر دیا ہے۔
عسکری ذرائع کے مطابق پاک فوج کا کہنا ہے کہ کتاب میں بہت سے موضوعات حقائق کے برعکس بیان کئے گئے ہیں، ذرائع کا کہنا ہے کہ لیفٹیننٹ جنرل (ر) اسد درانی کو اپنے بیانات پر پوزیشن واضح کرنے کے لئے جی ایچ کیو طلب کیا جا رہا ہے، انہیں ملٹری کوڈ آف کنڈکٹ کی خلاف ورزی پر بھی اپنی پوزیشن واضح کرنا ہو گی۔
عسکری ذرائع نے کہا ہے کہ یہ ایک بروقت اور زبردست قدم اٹھایا گیا ہے کیونکہ کوئی بھی ملک اور قانون سے بالاتر نہیں۔
پاک فوج کے شعبہ تعلقات عامہ (آئی ایس پی آر) نے کہا ہے کہ لیفٹیننٹ جنرل (ر) اسد درانی کو وضاحت کے لئے 28 مئی کو جی ایچ کیو طلب کر لیا گیا ہے۔
Lt Gen Asad Durrani, Retired being called in GHQ on 28th May 18. Will be asked to explain his position on views attributed to him in book ‘Spy Chronicles’. Attribution taken as violation of Military Code of Conduct applicable on all serving and retired military personnel.
— Maj Gen Asif Ghafoor (@OfficialDGISPR) May 25, 2018
لیفٹیننٹ جنرل (ر) اسد درانی اور بھارتی خفیہ ایجنسی ‘را’ کے سابق سربراہ امرجیت سنگھ دلت کی مشترکہ تصنیف ‘دی اسپائے کرونیکلز: را، آئی ایس آئی اینڈ دی الوژن آف پیس’ پچھلے دنوں مارکیٹ میں آئی ہے جس میں بہت سے متنازع موضوعات پر بات کی گئی ہے۔
کتاب میں جو موضوعات زیر بحث آئے ہیں ان میں کارگل آپریشن، ایبٹ آباد میں اسامہ بن لادن کی ہلاکت، کلبھوشن یادیو کی گرفتاری، حافظ سعید، کشمیر، برہان وانی وغیرہ شامل ہیں۔