سیلاب متاثرین کی مدد اور بحالی کےلیے 80 ارب روپے چاہئیں،وزیراعظم کی امداد کی اپیل


وزیراعظم شہبازشریف نےامداد کی اپیل کرتے ہوئے کہا ہےکہ سیلاب متاثرین کی مدد اور بحالی کےلیے  80 ارب روپے چاہئیں۔

اپنے پیغام میں  وزیراعظم نے کہا کہ جوقربانی اورایثار کا جذبہ قوم اور اداروں نے 2005 کے زلزلے اور 2010 کے سیلاب کے موقع پر دکھایا آج بھی وہی جذبہ دکھائیں۔

پوری قوم آگے بڑھ کر ہاتھ بٹائے تو ہم کئی گنا زیادہ رفتار سے متاثرین کی جلد امداد اور بحالی میں کامیاب ہوسکتے ہیں،سیلاب زدگان کےلیے قائم فنڈ میں دل کھول کرعطیات جمع کرائیں۔

وزیراعظم شہبازشریف کا کہنا ہے کہ ایثاراور قربانی میں ہماری قوم دنیا میں سب سے آگے ہے،میں سب سے تعاون کی درخواست کرتا ہوں،مصیبت زدہ بھائیوں کی انصار مدینہ کی طرح مدد کریں۔

وزیراعظم نے کہا کہ ملک میں بارشوں کا 30 سال کا ریکارڈ ٹوٹ گیا،بلوچستان اور سندھ میں تباہی وبربادی سے قیامت صغریٰ کا منظر ہے،سینکڑوں پاکستانی سیلاب کی بے رحم موجوں کی نظر ہوچکے ہیں،بہت بڑی تعداد میں لوگ بے گھر ہیں،مال مویشی، فصلوں ، باغات اور املاک کو نقصان پہنچا ہے۔

صوبائی حکومتوں،وفاقی وصوبائی اداروں اور مسلح افواج کے بھرپورتعاون سے ہم سب مل کر دن رات کام کررہے ہیں،اب تک مجموعی طور پر 37.2 ارب روپے سیلاب زدگان کے لئے مہیا کئے جارہے ہیں۔


متعلقہ خبریں