وفاقی وزیر ماحولیاتی تبدیلی شیری رحمان کا کہنا ہے کہ مارگلہ ہلز کا ٹریل 6 بند کر کے لیپرڈ پریزرویشن پارک بنایا ہے۔ اس زون میں کیمرہ ٹریپس کی مدد سے 9 تیندووں کی نشاندہی کی گئی ہے۔
وفاقی وزیرِ ماحولیاتی تبدیلی شیری رحمان نے مارگلہ نیشنل پارک میں قائم لیپرڈ پریزرویشن زون کا دورہ کیا۔
انہوں نے ٹوئٹر پر ایک پیغام میں بتایا ہے کہ تیندوؤں کے تحفظ اور لوگوں کی حفاظت کے لیے صرف گائیڈڈ ٹورز کی اجازت ہے۔
ہم نے مارگلہ ہلز کے ٹریل 6 کو بند کر کے اسے Leopards Preservation Park بنایا ہے۔ اس زون میں کیمرہ ٹریپس کی مدد سے 9 تیندووں کی شناخت کی گئی ہے، یہ پاکستان کیلئے ایک مثبت خبر اور بڑی کامیابی ہے۔ تیندووں کی تحفظ اور لوگوں کے حفاظت کیلئے اس زون میں صرف گائیڈڈ ٹوئر کی اجازت ہے۔ 2/3
— SenatorSherryRehman (@sherryrehman) December 11, 2022
انہوں نے کہا کہ مارگلہ ہلز نیشنل پارک ملک کا قیمتی اثاثہ ہے۔ اس نیشنل پارک کا شمار محفوظ علاقوں میں ہوتا ہے۔
ان کا کہنا ہے کہ مارگلہ ہلز نیشنل پارک جانوروں، پرندوں اور دیگر جنگلی حیات کا قدرتی مسکن ہے، یہ پاکستان کے لیے مثبت خبر اور بڑی کامیابی ہے۔
وفاقی وزیر نے مزید کہا کہ ہم نے نیشنل پارکس میں 12 فیصد اضافہ کیا ہے ہمیں قدرتی جنگلی حیات کو ان کے مسکن واپس دینے ہوں گے۔
ان کا یہ بھی کہنا ہے کہ جنگلی حیات، قدرتی ماحولیات اور نیشنل پارک کی بحالی ہم سب کی ذمے داری ہے۔