قومی ٹیم کے کپتان بابر اعظم کی تینوں فارمیٹ کی کپتانی برقرار رہے گی یا نہیں فیصلہ نیوزی لینڈ سیریز کے بعد ہوگا۔
ذرائع پی سی بی کے مطابق چئیرمین پی سی بی مینجمنٹ کمیٹی نجم سیٹھی دیگر ممبران سے مشاورت سے حتمی فیصلہ کریں گے، پی سی بی مینجمنٹ کمیٹی بابر اعظم کی کپتانی کا باریک بینی سے معائنہ کررہی ہے۔ مینجمنٹ کمیٹی کے کچھ ارکان کو بابر اعظم کی ٹیسٹ کپتانی پر تحفظات ہیں۔
کچھ کی نظر میں ہوم سیریز کے دوران اہم موقع پر کپتان نے فیصلے درست نہیں کئے، چند ارکان سمجھتے ہیں کہ مین باولرز کی انجری کے باعث بابر اعظم کو بطور کپتان مشکلات پیش آئیں، ذرائع کے مطابق چند ارکان کی رائے ہے کہ بابر اعظم ہمارے اہم کھلاڑی ہیں ان کو بطور کپتان مزید موقع دینے کی ضرورت ہے۔
یہ بھی پڑھیں: سینئر کھلاڑی مشکل وقت میں کھیلتا ہے، بابر اعظم
ذرائع پی سی بی کا کہنا ہے کہ مینجمنٹ کمیٹی کی اکثریت بابر اعظم کی ون ڈے اور ٹی ٹوئنٹی کی کپتانی سے مطمئن ہے۔
بابر اعظم نے پچھلے سال بطور کپتان دس ٹیسٹ میچز میں سے صرف 1 جیتا 5 ہارے اور 4 برابر رہے۔ جبکہ بابر اعظم کی کپتانی میں پاکستان نے آخری دس ون ڈے میں سے نو میں جیت حاصل کی ہے۔
بابر اعظم کی کپتانی میں قومی ٹیم نے ایشیا کپ اور ٹی ٹوئنٹی ورلڈ کپ کا فائنل بھی کھیلا ہے، بطور کپتان بابر اعظم نے پچھلے ایک سال میں چھبیس ٹی ٹوئنٹی میچوں میں سےچودہ میچز جیتے۔
