لاہور: سابق وزیر اعلیٰ پنجاب پرویز الہٰی نے کہا ہے کہ معلوم نہیں نگران حکومت کس ایجنڈے پر آئی ہے۔
سابق وزیر اعلیٰ پنجاب پرویز الہٰی نے اپنے ایک بیان میں الزام عائد کرتے ہوئے کہا کہ ہماری پارٹی کے قانونی مشیر عامر سعید راں کو وفاقی تحقیقاتی ادارے (ایف آئی اے) نے گرفتار کر لیا ہے۔ ایف آئی اے نے میرے گھر سے واپس جاتے ہوئے سعیدراں کو اٹھایا۔
انہوں نے کہا کہ گاڑیوں سے پتہ چلا کہ ایف آئی اے کے ساتھ کچھ لوگوں نے انہیں گرفتار کیا۔ نگران حکومت اور ان کے حواری ایسے ہتھکنڈوں سے باز رہیں۔
یہ بھی پڑھیں: پشاور, پولیس لائن دھماکے کا مقدمہ تھانہ سی ٹی ڈی میں درج
پرویز الہٰی نے کہا کہ پتہ نہیں یہ نگران حکومت کس ایجنڈے پر آئی ہے کہ چن چن کر ہمارے قریبی ساتھیوں کو ٹارگٹ کر کے اٹھایا جا رہا ہے۔
انہوں نے کہا کہ نگران حکومت اگر امن و امان کو کنٹرول نہیں کر سکتی تو پھر بہتر ہے کہ گھر جائے۔
