وزیراعظم نے’کل جماعتی کانفرنس’ بلا لی، عمران خان کو بھی شرکت کی دعوت


وزیراعظم شہباز شریف نے 7 فروری کو کل جماعتی کانفرنس طلب کرلی جس میں چیئرمین تحریک انصاف عمران خان کو بھی شرکت کی دعوت دی گئی ہے۔

اعلامیے میں کہا گیا ہے کہ وزیراعظم نے اہم قومی چیلنجز پر تمام سیاسی قائدین کو ایک میز پر بٹھانے کا فیصلہ کیا ہے، تمام قومی سیاسی قائدین کو اے پی سی میں شرکت کی باضابطہ دعوت دی گئی ہے۔

اعلامیے کے مطابق لیگی رہنما ایاز صادق کے پی ٹی آئی رہنماوں اسد قیصر اور پرویز خٹک سے رابطے ہوئے ہیں اور انہیں وزیراعظم کی طرف سے عمران خان کو اے پی سی میں شرکت کی دعوت دی ہے۔

وزیراعظم نے کل پشاور میں ہونے والی اپیکس کمیٹی کے اجلاس میں پی ٹی آئی کے دو نمائندوں کو بھی شرکت کی دعوت دے دی ہے۔

عمران خان کا جام پور سے ضمنی الیکشن نہ لڑنے کا فیصلہ

ایاز صادق نے وزیراعظم کا یہ پیغام اسد قیصر اور پروز خٹک کو پہنچایا کہ دہشت گردی کے خلاف اپیکس کمیٹی میں پی ٹی آئی کے دو نمائندوں کو شریک ہونے کی دعوت دیتا ہوں۔

سردار ایاز صادق نے پی ٹی آئی رہنماؤں کو اپنی جماعت کے نامزد نمائندوں کے ناموں سے آگاہ کرنے کی درخواست کی۔

گورنر ہاؤس میں اپیکس کمیٹی کے اجلاس میں تمام اسٹیک ہولڈرز، پولیس، رینجرز اور حساس اداروں کے اعلیٰ افسران شریک ہوں گے۔

اجلاس میں 30 جنوری کو پشاور پولیس لائنز کی مسجد میں ہونے والے دہشت گردی کے واقعے پر غور ہوگا۔

اپیکس کمیٹی کے اجلاس میں دہشت گردی کے خاتمے، سی ٹی ڈی اور پولیس کی اپ گریڈیشن کے اقدامات پر غور ہوگا۔


متعلقہ خبریں