بیجنگ: چین میں اپنی بیوی سے 2 سال تک انعامی رقم چھپانے والے شخص کو ہرجانہ ادا کرنا پڑ گیا۔
غیر ملکی خبر رساں ایجنسی کے مطابق چینی شہری نے اپنی بیوی سے 2 سال تک 10 ملین یوآن یعنی 15 لاکھ امریکی ڈالر کی انعامی رقم چھپا کر رکھی جسے عدالت نے ہرجانہ ادا کرنے کا حکم دیا۔
مذکورہ شخص کا 2021 میں 10 یوآن کی لاٹری ٹکٹ میں انعام نکلا تھا اور لازمی سرکاری ٹیکس کی ادائیگی کے بعد اس کے پاس ساڑھے 8 ملین یوآن کی رقم بچی تھی جو تقریباً 12 لاکھ 30 ہزار امریکی ڈالرز کے برابر ہے۔
انعامی رقم بینک اکاؤنٹ میں آتے ہی چینی شہری ژوو نے 2 ملین یوآن اپنی بہن اور 7 لاکھ یو آن اپنی سابقہ بیوی کے اکاؤنٹ میں منتقل کر دیئے تھے جس کا چینی شہری کی بیوی کو معلوم ہو گیا۔
یہ بھی پڑھیں: دنیا کی مہنگی ترین موٹرسائیکل
ژوو کی اہلیہ نے تمام تفصیلات سامنے آنے کے بعد شوہر سے طلاق کی درخواست دائر کر دی اور انعامی رقم چھپانے پر مقدمہ بھی کر دیا۔
چینی قانون کے مطابق انعامی رقم میں اہلیہ بھی برابر کی حقدار ہوتی ہے لیکن چینی شہری نے اپنی اہلیہ سے نہ صرف تمام بات چھپائے رکھی بلکہ حصہ بھی نہیں دیا جس پر عدالت نے انعامی رقم کا 60 فیصد حصہ ہرجانے کے طور پر اہلیہ کو دینے کا حکم دے دیا۔
