اسلام آباد: چیئرمین تحریک انصاف عمران خان کی سابقہ اہلیہ ریحام خان کی کتاب سیاسی حلقوں میں موضوع بحث بنی ہوئی ہے جبکہ تحریک انصاف نے ریحام خان پرالزام عائد کیا ہے کہ وہ ن لیگی رہنماؤں سے رابطے میں ہیں۔
ریحام خان کی کتاب اشاعت سے قبل ہی سوشل میڈیا پرمتنازعہ بن گئی، تحریک انصاف کے ترجمان فواد چوہدری نے اپنے ایک ٹوئٹ میں انکشاف کیا ہے کہ ریحام خان سابق وزیراعظم نوازشریف کی بیٹی مریم نواز سے ملی ہیں اوراس ملاقات کا اہتمام مسلم لیگ ن کے رہنما احسن اقبال نے کرایا تھا۔
We now have solid evidence to prove Reham Khan was meeting @MaryamNSharif through Ahsan Iqbal @betterpakistan so the whole book is an exercise to demolish only real opposition i.e #PTI #RehamOnPMLNAgenda
— Fawad Hussain (@fawadchaudhry) June 2, 2018
فواد چودھری کے مطابق کتاب کی تصنیف و اشاعت کا سارا تماشہ حقیقی حزب اختلاف کو گرانے کے لیے رچایا گیا، انہوں نے دعوی کیا کہ ان ملاقاتوں کے ٹھوس ثبوت موجود ہیں اوران ناقابل تردید دستاویزی شواہد نے ساری سازش کا پول کھول دیا ہے۔
سوشل میڈیا صارفین بھی کتاب پرخوب تجزیے اورتبصرے کررہے ہیں، اینکرپرسن اور پی ٹی آئی کے کارکن حمزہ علی عباسی نے اپنے ٹویٹ میں تنقید کرتے ہوئے کہا کہ کتاب کا خلاصہ یہ ہے کہ عمران خان سب سے برا انسان اورریحام خان صادق خاتون ہیں، ایک صارف نے تو ریحام خان کو مسلم لیگ ن کی کٹھ پتلی قرار دیتے ہوئے کہا کہ وہ ایک خاص ایجنڈے پرکام کررہی ہیں۔
کتاب اوراپنی ذات پرتنقید کے بعد ریحام خان بھی کہاں چپ رہنے والی تھیں، وہ بھی میدان میں آگئیں اورسوشل میڈیا پربیان داغ دیا کہ حمزہ علی عباسی نے کتاب چھپنے سے پہلے ہی پڑھ لی، یہ صرف فراڈ اور چوری سے ہی ممکن ہے۔
Hamza Abbasi claims he has read manuscript when it’s not been published? Only possible through fraud or theft.
— Reham Khan (@RehamKhan1) June 2, 2018
ریحام خان نے مزید لکھا کہ میں سوشل میڈیا پر ان اکاؤنٹس کے خلاف رپورٹ کرا رہی ہوں جن میں لوگوں کو تشدد پراُکسایا جا رہا ہے۔
