لندن: چیئرمین تحریک انصاف عمران خان کی سابقہ اہلیہ جمائمہ خان بھی عمران خان کے دفاع کے لیے میدان میں آ گئیں۔
سماجی رابطے کی ویب سائٹ پر اپنے ٹویٹ میں جمائمہ خان نے کہا ہے کہ عمران خان کے خلاف لکھی گئی ریحام خان کی کتاب اگر برطانیہ سے شائع ہوئی تو وہ ریحام خان کے خلاف مقدمہ دائر کریں گی، ریحام خان کی کتاب برطانیہ میں شائع ہونے کے قابل ہی نہیں ہے۔
On Reham Khan’s book I’ve been assured that it’s too libellous to be published in the UK but if it is published here, I will be suing for defamation & breach of privacy on behalf of my (then) 16 yr old son & in relation to the moronic, re-hashed Zionist conspiracy theories. Sigh
— Jemima Goldsmith (@Jemima_Khan) June 6, 2018
جمائمہ کا کہنا تھا کہ وہ اپنے 16 برس کے بیٹے کی ذاتی زندگی میں مداخلت پر ریحام خان کے خلاف مقدمہ درج کرائیں گی اور ہرجانے کا دعویٰ بھی دائر کریں گی۔
جمائمہ نے ریحام خان کی طرف سے یہودی ہونے کا الزام لگانے پر بھی عدالت جانے کا اعلان کر دیا ہے۔
عمران خان کی سابقہ اہلیہ ریحام خان کی کتاب کے اشاعت سے قبل ہی میڈیا اور سوشل میڈیا پر بہت چرچے ہیں، ریحام خان کی کتاب کا کچھ حصہ میڈیا پر آنے کے بعد تحریک انصاف میں کھلبلی مچ گئی ہے۔
ترجمان تحریک انصاف فواد چوہدری نے بھی ریحام خان کی جانب سے اپنی کتاب میں لگائے گئے الزامات کے خلاف عدالت سے رجوع کرنے اور ہتک عزت کا دعویٰ دائر کرنے کا اعلان کیا ہے۔
ریحام خان نے عمران خان سے علیحدگی کے بعد اپنی نجی زندگی سے متعلق کتاب لکھنے کا اعلان کیا تھا جو اب مکمل ہو چکی ہے اور جلد شائع ہو جائے گی۔
تحریک انصاف نے دعویٰ کیا ہے کہ اس کتاب کی اشاعت میں مسلم لیگ ن ملوث ہے اس لیے اسے الیکشن سے دو ماہ قبل سامنے لایا جا رہا ہے تاکہ تحریک انصاف کی ساکھ کو متاثر کیا جا سکے۔