اسلام آباد: بابراعوان نے کہا ہے کہ ن لیگ کو تین وجوہ کی بنا پر حسن عسکری کے نگراں وزیراعلیٰ بننے پر اعتراض ہے۔
انہوں نے ٹوئٹر پر شائع اپنے ایک پیغام میں ن لیگ کی تنقید پر ردعمل کا اظہار کرتے ہوئے کہا کہ پی ٹی آئی کی جانب سے نامزد کردہ حسن عسکری اس لیے ن لیگ کو قبول نہیں کیونکہ ان میں 35 پنکچر لگانے کی صلاحیت موجود نہیں اور نہ وہ کبھی جاتی امرا کے دربار میں حاضر ہوئے ہیں۔
حسن عسکری پہ ن لیگ کے 3 اعتراض
۱) ۳۵ پنکچر لگانے کی صلاحیت موجود نہیں
۲) کبھی جاتی امراہ کے دربار میں حاضر نہیں ہوئے۔
۳) اعلٰی تعلیم یافتہ آدمی وزیرِ اعلٰی کیسے بن سکتا ہے؟— Babar Awan (@BabarAwanPK) June 7, 2018
انہوں نے یہ بھی لکھا ہے کہ سب سے بڑی بات تو یہ ہے کہ اعلیٰ تعلیم یافتہ آدمی کیسے وزیراعلیٰ بن سکتا ہے۔
بابر اعوان کا یہ ٹویٹ ن لیگ کے اس بیان کے بعد سامنے آیا ہے جس میں انہوں نے نگراں وزیراعلیٰ پنجاب کے لیے حسن عسکری کے نام پر اعتراضات اٹھائے تھے۔
ن لیگ کا کہنا تھا کہ حسن عسکری ایک جانبدار انسان ہیں جب کہ نگراں وزیراعلیٰ کے لیے ان کا نامزد ہونا بدقسمتی ہے کیونکہ ان کے بیانات سے مسلم لیگ کے ساتھ ان کا تعصب نظر آتا ہے۔
سابق وزیراعظم شاہد خاقان عباسی اور مسلم لیگ ن کے دیگر رہنماؤں نے لاہور میں میڈیا سے گفتگو کرتے ہوئے کہا تھا کہ الیکشن کمیشن نے حسن عسکری کا نام منتخب کرکے انتخابات کو مشکوک بنا دیا ہے۔
