سنگاپور: امریکی صدر ڈونلڈ ٹرمپ اور شمالی کوریا کے رہنما کم جانگ ان تاریخی ملاقات کے لیے سنگاپور پہنچ گئے ہیں۔
ملاقات کے لیے پہلے شمالی کوریا کے رہنما کم جانگ ان سنگاپور پہنچے جبکہ امریکی صدر کی آمد ان کے بعد ہوئی، کم جانگ کا سنگاپور کے چانگی ائیرپورٹ پہنچنے پر وزیرخارجہ ویویان بلکر شنان نے استقبال کیا اور اس کی ایک تصویر بھی اپنے ٹویٹراکاؤنٹ پر شیئر کی۔
Welcomed Chairman Kim Jong Un, who has just arrived in Singapore. pic.twitter.com/ZLK4ouIejx
— Vivian Balakrishnan (@VivianBala) June 10, 2018
شمالی کوریا کے رہنما نے سنگاپور کے وزیراعظم لی ہیسن لونگ سے ملاقات کی اور اہم امور پر تبادلہ خیال کیا جبکہ کم جانگ کی آمد کے کئی گھنٹوں بعد امریکی صدر بھی ائیر فورس ون کے ذریعے سنگاپورپہنچے، ان کا استقبال بھی وزیرخارجہ نے ہی کیا۔
ذرائع کے مطابق دونوں رہنماؤں کے درمیان ملاقات 12 جون کو ہوگی جس کے لیے تمام ضروری انتظامات کیے جا چکے ہیں۔
مبصرین اس ملاقات کو دونوں ممالک کے دو طرفہ تعلقات میں ایک اہم پیش رفت اور تاریخی قدم قرار دے رہے ہیں جبکہ امریکی صدر خود بھی اس ملاقات کے مثبت نتائج کے لیے پرامید ہیں۔
