نگراں کابینہ کو بھرتیوں کا اختیار نہیں، شیری رحمان

نگراں کابینہ سرکاری بھرتیاں نہیں کرسکتی ہے، نفیسہ شاہ

اسلام آباد: پاکستان پیپلزپارٹی کی مرکزی رہنما اور سینیٹ میں قائد حزب اختلاف سینیٹر شیری رحمان نے کہا ہے کہ نگراں کابینہ کو سرکاری ملازمتوں میں بھرتیاں کرنے کا اختیار نہیں ہے۔

شیری رحمان نے سماجی رابطے کی ویب سائٹ ٹوئٹرپر کہا ہے کہ نگراں کابینہ کی سرکاری ملازمتوں میں بھرتیاں  انتخابی ایکٹ 2017 میں بیان کردہ حدوں کو پار کرنے کے مترادف ہے۔

انہوں نے کہا کہ نگراں حکومت کا مینڈیٹ صرف آزاد اور منصفانہ انتخابات کرانا ہے، اُن کا کام انتظامی تبدیلیاں کرنا نہیں۔

پاکستان پیپلزپارٹی کی رہنما ڈاکٹر نفیسہ شاہ نے بھی نگراں کابینہ کی جانب سے سرکاری نوکریاں دینے پر ردعمل میں کہا ہے کہ نگراں کابینہ کس حیثیت میں سرکاری بھرتیاں کر سکتی ہے۔

انہوں نے کہا کہ انتخابی شیڈول کے اعلان کے بعد بھرتیاں کرنا پری پول دھاندلی ہے کیونکہ سرکاری بھرتیاں کرنا نگراں کابینہ کا مینڈیٹ نہیں اس لیے الیکشن کمیشن کو اس کا  فوری نوٹس لینا چاہیے۔

انہوں نے کہا کہ الیکشن 2017 ایکٹ کے تحت نگراں کابینہ انتخابات کو منصفانہ اور بروقت کرائے اور اپنی آئینی ذمہ داری پوری کرے۔

متعلقہ خبریں