بلاوایو: قومی کرکٹ ٹیم کے کپتان سرفراز احمد نے کہا ہے کہ ہم اس سیریز کے ذریعے ایشیا کپ کے لیے اچھی ٹیم تیارکرنا چاہتے ہیں اسی لیے اسکواڈ میں موجود تمام کھلاڑیوں کو موقع دیا جائے گا۔
انہوں نے زمبابوے کے شہر بلاوایو میں ذرائع ابلاغ (میڈیا) سے بات چیت کرتے ہوئے کہا کہ محمد حفیظ، یاسر شاہ اور شاداب خان کو ایک ساتھ میچ میں آزمایا جاسکتا ہے۔
انہوں نے کہا کہ صرف یاسر شاہ کو کچھ میچز میں آزمایا جائے گا تاکہ معلوم ہوسکے کہ ایشیا کپ کے لیے کیسی ٹیم اچھی کارکردگی دکھا سکے گی۔
ان کا کہنا تھا کہ ہمیں محمد حفیظ کی بولنگ سے کافی فائدہ پہنچ سکتا ہے جو ٹیم کے لیے اچھا ہے۔
قومی کرکٹ ٹیم کے کپتان نے کہا کہ وہ ون ڈے میں نمبر پانچ پر بیٹنگ کرنے کو ترجیح دیں گے۔ انہوں نے کہا کہ میچ میں ٹاس ہارنا مایوس کن ہوسکتا ہے لیکن ہماری پوری کوشش ہوگی کہ اچھے کھیل کا مظاہرہ کریں۔
پاکستان اور زمبابوے کے درمیان بلاوایو میں پہلا ون ڈے کل کھیلا جائے گا۔
