کراچی: اوپن مارکیٹ میں روپے کی قدر میں تاریخی کمی ہوئی ہے جس کی وجہ سے امریکی ڈالر تین روپے 80 پیسے کے اضافے سے 127 روپے تک پہنچ گیا ہے۔
انٹربینک مارکیٹ میں بھی ڈالر کی قیمت میں چار روپے 40 پیسے اضافہ ہوا ہے اور ڈالر 124 روپے پر خریدا جبکہ 126 روپے میں فروخت ہو رہا ہے۔
پاکستان تحریک انصاف کے رہنما اسد عمر نے اپنے ٹویٹ میں کہا ہے کہ ڈالر کی قیمت 125 روپے سے تجاوز کر گئی ہے، اس کی بنیادی وجہ زرمبادلہ کے ذخائر میں خطرناک کمی ہے، انہوں نے کہا کہ کشکول توڑنے نکلے تھے، میاں صاحب نے معیشت ہی توڑ ڈالی۔
ایک ڈالرکی قدر 125 روپیہ سے تجاوز کر گئ۔ بنیادی وجہ زر مبادلہ کے زخائر میں خطرناک کمی۔صرف 6 ھفتے کی درامدات کے برابر زرمبادلہ کے زخائر ۔ کشکول توڑنے نکلے تھے میاں صاحب نے معیشت ہی توڑ ڈالی۔۔۔
— Asad Umar (@Asad_Umar) July 16, 2018
زرمبادلہ میں کمی کی وجہ سے ڈالر کی قیمت میں مسلسل اضافہ ہو رہا ہے، جمعہ کے روز کاروبار کے اختتام پر ڈالر کی قیمت 121 روپے 54 پیسے تھی۔
رواں سال کے آغاز میں ڈالر 110 روپے 50 پیسے پر تھا جس میں مسلسل اضافہ ہوتا رہا اور آج روپے کی قدر میں کمی کے پچھلے تمام ریکارڈ ٹوٹ گئے۔