لاہور: ن لیگ کے رہنما خواجہ سعد رفیق نے این اے 131 لاہور میں عمران خان کی کامیابی کوچیلنج کر دیا ہے۔
گزشتہ روز سامنے آنے والے غیرحتمی و غیرسرکاری نتائج کے خلاف سعد رفیق نے ریٹرنگ افسر محمد اختر بھنگو کو درخواست جمع کرائی ہے۔
یہ بھی دیکھیں: عمران خان نے لاہور میں خواجہ سعد رفیق کو شکست دے دی
سامنے آنے والے انتخابی نتائج کے مطابق تحریک انصاف سربراہ سعد رفیق کے مقابل چند سو ووٹوں کے فرق سے جیتے تھے۔
گزشتہ روز بھی سعد رفیق کی جانب سے یہ دعوی سامنے آیا تھا کہ عمران خان گزشتہ شب کے نتائج کے مطابق ہار چکے تھے لیکن قانون کے مطابق نتیجہ امیدواروں کو فراہم نہیں کیا گیا جس کے بعد تحریک انصاف سربراہ کو کامیاب قرار دینے کی کوشش کی جا رہی ہے۔
عمران نے این اے 131 کا الیکشن 50 کروڑ روپے میں خریدا۔
اندھا دھند پیسا لُٹایا گیا۔
ووٹ کی خرید و فروخت کی گئی۔
— Khawaja Saad Rafique (@KhSaad_Rafique) 26 July 2018
اپنے ردعمل میں ان کا کہنا تھا کہ 40 پولنگ سٹیشنوں پر پولنگ ایجنٹس کو نتائج دینے میں غیر معمولی تاخیر اور انکار کیا گیا، فوت شدہ لوگوں کے ووٹ بھی ڈالے گئے۔
40 پولنگ سٹیشنوں پر پولنگ ایجنٹس کو نتائج دینے میں غیر معمولی تاخیر اور انکار کیا گیا۔
فوت شدہ لوگوں کے ووٹ بھی ڈالے گئے۔
— Khawaja Saad Rafique (@KhSaad_Rafique) 26 July 2018
ریٹرننگ افسر کو دی گئی درخواست میں کہا گیا ہے کہ این اے 131 میں سینکڑوں ووٹ مسترد ہوئے جو پریزائیڈنگ افسر نے دانستہ طور پر کیے ہیں۔
این اے 131 کے ووٹوں کی دوبارہ گنتی کی استدعا کرتے ہوئے کہا گیا ہے کہ گنتی کے نتائج سامنے آنے تک نتائج جاری نہ کیے جائیں۔