راولپنڈی: افواج پاکستان کے سربراہ جنرل قمر جاوید باجوہ نے قومی شجرکاری مہم کے سلسلے میں پاکستان آرمی کے ‘سرسبز و شاداب پاکستان’ مہم کا آغاز پودا لگا کر کیا ۔
پاک فوج کے شعبہ تعلقات عامہ (آئی ایس پی آر) کے مطابق پیر کے روز جنرل قمر جاوید باجوہ نے اپنی اہلیہ کے ہمراہ پودا لگا کر ملک گیر ’سرسبز و شاداب پاکستان‘ شجر کاری مہم کا افتتاح کر دیا۔
* پاک فوج کا یوم آزادی پر قوم کو تحفہ
* قومی شجر کاری مہم میں بھرپور شرکت
* آرمی چیف اور انکی اہلیہ نے ملک گیر ‘سرسبز و شاداب پاکستان’ مہم کا آغاز کیا
* آج ۲۰ لاکھ پودے لگاۓ گئے
* پاکستانیوں سے قومی مہم میں بھر پور شرکت کی اپیل
* درخت زندگی ہیں۔ درخت لگائیں زندگی بچائیں- آرمی چیف pic.twitter.com/dStSd3UKBJ— Maj Gen Asif Ghafoor (@OfficialDGISPR) August 13, 2018
آئی ایس پی آر کے ڈائریکٹر جنرل میجر جنرل آصف غفور کے مطابق پاک فوج کی جانب سے شجر کاری مہم میں بھرپور حصہ لیا گیا اور پہلے دن ملک بھر میں 20 لاکھ پودے لگائے گئے۔
اس سال مون سون سیزن کے دوران مجموعی طور ایک کروڑ درخت لگانے کا ہدف رکھا گیا ہے اور اس شجرکاری مہم کو ‘سرسبز و شاداب پاکستان’ کا نام دیا گیا ہے۔
میرپور آزاد کشمیر میں کور کمانڈر منگلا لیفٹینٹ جنرل اظہر صالح عباسی نے پودا لگا کر شجر کا ری مہم کا آغاز کیا۔
اس موقع پر گفتگو کرتے ہوئے کور کمانڈر منگلا نے کہا ‘سرسبز و شاداب پاکستان’ کے سلسلے میں آزاد کشمیر میں 10 لاکھ پودے لگائے جائیں گے، جنرل عباسی نے کہا کہ 70 فیصد اسٹریٹیجیک شجرکاری ہو گی جبکہ 30 فیصد شجر کاری کینٹ کی حدود میں کی جائے گی۔
انہوں نے کہا کہ پاک فوج اپنی پیشہ ورانہ عسکری خدمات کے ساتھ ساتھ جنگلات لگانے کا قومی فریضہ بھی ادا کرے گی۔
مہم کے پہلے روز جڑی کس کینٹ، نکودر، سالک شہید کینٹ اور چک دولت کینٹ میں بھی پودے لگائے گئے۔