اسلام آباد: پاکستان تحریک انصاف کی جانب سے نامزدگی کے بعد صدر منتخب ہونے والے ڈاکٹر عارف علوی نے آج ملک کے تیرہویں صدر کی حیثیت سے حلف اٹھا لیا ہے۔
چیف جسٹس پاکستان جسٹس ثاقب نثار ڈاکٹر عارف علوی سے صدر کے عہدے کا حلف لیا۔ تقریب حلف برداری ایوان صدر میں منعقد کی گئی جب کہ مہمانوں کی خاطر تواضع کے لیے صرف چائے اور بسکٹ رکھے گئے۔
تقریب حلف برداری میں وزیراعظم عمران خان، آرمی چیف جنرل قمر جاوید باجوہ سمیت اعلیٰ سیاسی و عسکری حکام شریک ہوئے جب کہ غیر ملکی سفیروں کو بھی تقریب میں شرکت کی دعوت دی گئی تھی۔
تقریب میں چاروں صوبوں کے وزرائے اعلیٰ، گورنرز اور وفاقی کابینہ کے ارکان نے بھی شرکت کی۔ تقریب کے بعد قومی ترانے کی دھن بجائے گئی۔
ڈاکٹر عارف علوی چار ستمبر کو ہونے والے صدارتی الیکشن کے نتیجے 353 الیکٹورل ووٹ لے کرصدر منتخب ہوئے تھے۔ اپوزیشن مضبوط پوزیشن ہونے کے باوجود اپنا متفقہ امیدوار لانے میں ناکام ہوگئی تھی جس کا فائدہ پاکستان تحریک انصاف کو ہوا۔
ڈاکٹرعارف علوی کا شمار تحریک انصاف کے بانی ممبران میں ہوتا ہے۔
ڈاکٹرعارف علوی 29 جولائی 1949 کو پیدا ہوئے اور وہ پیشے کے اعتبار سے ڈینٹسٹ ہیں جب کہ پاکستان ڈینٹل کونسل اور ایشیا پیسیفک ڈینٹل فیڈریشن کے صدر رہے ہیں۔
صدر مملکت ممنون حسین اپنے عہدے کی مدت ہونے پر ایوان صدر سے رخصت ہوگئے۔ صدر مملکت کو پاک فوج کے چاک و چوبند دستے نے الوداعی گارڈ آف آنر پیش کیا۔
