اسلام آباد: پاکستان میں جرمنی کے سفیر مارٹن کوبلر کی طرف سے اسلام آباد میں پڑے کوڑے اور کچرے کے ڈھیروں کی نشاندہی کے بعد وفاقی ترقیاتی ادارے (سی ڈی اے) کی انتظامیہ حرکت میں آ گئی ہے اور ڈائریکٹرسنیٹیشن سردار خان زمری نے ایف سیون ایریا کے انسپکٹر اور سپروائزر کومعطل کر دیا ہے۔
مارٹن کوبلر نے اسلام آباد کے سیکٹر ایف سیون میں کچرے کے ایک ڈھیر کے ساتھ سیلفی بنا کر اسے ٹویٹ کر دیا تھا۔
جرمن سفیر کا کہنا تھا کہ اسلام آباد ایک خوبصورت شہر ہے، کچرے کے ڈھیر وبائی امراض پھیلنے کا سبب بنتے ہیں، ڈینگی مچھر کی پیدائش کی ایک وجہ بھی یہی گندگی ہے۔
سڑک سے گزرتے ہوے Islamabad# میں جہاں خوبصورت جگہ نظر آتی ہے وہیں جابجا کوڑے کے ڈھیر بھی جیسے کہ F7/4 گلی 56میں۔ ٹھوس کوڑا اس طرح سے ہر جگہ نہیں پھینکا جاسکتا۔یہ ڈینگی اور دیگر مضرِ صحت اثرات کا سبب بنتا ہے! کیا کیا جاسکتا ہے؟ pic.twitter.com/5JimvTefth
— Martin Kobler (@KoblerinPAK) September 25, 2018
مارٹن کوبلر کی جانب سے گندگی کے ان ڈھیروں کی نشاندہی کے بعد سی ڈی اے سینیٹیشن کی ٹیم نے کچرا اٹھا دیا ہے اور غفلت کے مرتکب اہلکاروں کو معطل کر دیا ہے۔
انہوں نے اپنے جوابی ٹویٹ میں مارٹن کوہلر کا شکریہ ادا کیا ہے اور ادارے کو درپیش مسائل کا ذکر کیا ہے۔
Dear Martin thanks for pointing out. we CDA/MCI regularly collecting alternative days thrice a week from house to house but unfortunately workers of private houses dumps garbage at off times and not cooperative. However we try best for best services within limited sources. https://t.co/gccozuPKS5
— Sardar Zimri (@SardarZimri) September 25, 2018
ڈائریکٹرسنیٹیشنن سردار خان کا کہنا تھا کہ معطل کیے گیے اہلکاروں کے خلاف انکوائری کی جائے گی۔ انہوں نے بتایا کہ ان کی ٹیم تین دن کچرا اٹھاتی ہے، پرائیویٹ گھروں میں رہنے والوں نے یہ کچرا پھینکا تھا۔