اسلام آباد: وفاقی وزیر اطلاعات فواد چوہدری نے کہا ہے کہ پاکستان پیپلز پارٹی (پی پی پی) نے ریڈیو پاکستان سمیت تمام ملکی اداروں کو تباہ کر دیا ہے۔
فواد چوہدری نے سماجی رابطے کی ویب سائٹ ٹوئٹر پر اپنے ایک بیان میں کہا کہ پیپلز پارٹی کے رہنما خورشید شاہ نے صرف تین روز میں 800 افراد کو ریڈیو پاکستان میں بھرتی کیا تھا۔
انہوں نے کہا کہ سابق اپوزیشن لیڈر کے اس اقدام کی وجہ سے ریڈیو پاکستان پر سات کروڑ روپے کا اضافی بوجھ پڑا۔
PPP destroyed all institutions including PBC by filling its own cronies , in three days Khursheed Shah filled 800 people only in Radio!costing 7 crore Rs additional burden, Govt is drowning 5 B Rs every year only on Radio thanks to PPP visionless policy https://t.co/nv2OaM5HeI
— Ch Fawad Hussain (@fawadchaudhry) September 27, 2018
فواد چوہدری نے کہا کہ حکومت کو پیپلز پارٹی کی غلط پالیسیوں کی وجہ سے ریڈیو پاکستان پر سالانہ پانچ ارب روپے لگانا پڑ رہے ہیں۔
ریڈیو پاکستان کے سلسلہ میں اٹھائے گئے اقدامات پر تنقید کرتے ہوئے وفاقی وزیر اطلاعات نے کہا کہ ہم پیپلز پارٹی کی ویژن لیس پالیسی کا شکریہ ادا کرتے ہیں۔ پیپلز پارٹی نے تمام سرکاری اداروں میں اپنے ساتھیوں کا تقرر کیا۔
پاکستان تحریک انصاف کی حکومت نے ریڈیو پاکستان کو موجودہ بلڈنگ سے منتقل کرنے کا فیصلہ کیا تھا جس کے خلاف ملازمین نے احتجاج کیا۔ گزشتہ روز بھی ریڈیو پاکستان کے ملازمین نے ریڈیو پاکستان کی بلڈنگ سے پارلیمنٹ ہاؤس تک احتجاجی ریلی نکالی تھی۔
ریڈیو پاکستان کے ملازمین کے مستقل احتجاج کے باعث بدھ کو حکومت نے سرکاری ریڈیو کی شفٹنگ کا فیصلہ واپس لے لیا تھا۔