عہد وفا اور فواد خان کا کنیکشن

اسلام آباد: پاک فوج کے شعبہ تعلقات عامہ (آئی ایس پی آر) کے تعاون سے بنائے گئے مومنہ درید (ایم ڈی) پروڈکشنز کی پیشکش، ہم ٹی وی کے بلاک بسٹر ڈرامہ سیریل ’عہد وفا‘ کی آخری قسط  کے لیے معروف اداکار فواد خان نے نیک خواہش کا اظہار کیا ہے۔

اپنے بیان میں ان کا کہنا تھا کہ میں نےعہد وفا کے حوالے سے بہت اچھی باتیں سن رکھی ہیں۔ سب لوگ عہد وفا کی آخری قسط دیکھنے ضرور آئیں۔

انہوں نے کہا کہ میری ہمیشہ سے پوری ہم فیملی کے لیے نیک خواہشات رہی ہیں ۔

واضح رہے ’عہد وفا‘ کی آخری قسط کی سینما گھروں میں نمائش کے لیے ٹکٹوں کی فروخت جاری ہے۔

یہ بھی پڑھیں: عہد وفا کے ’ملک شاہ زین‘ اور ’شہریار‘ نوجوانی میں کیسے دکھتے تھے؟

دوسری جانب ’عہد وفا‘ کی آخری قسط کے ٹریلر نے مقبولیت کے نئے ریکارڈ قائم کر دیے ہیں۔ مذکورہ ڈرامہ سیریل کی آخری قسط کے ٹریلر کو صرف یوٹیوب پر 46 لاکھ سے زائد مرتبہ دیکھا جا چکا ہے۔

ایم ڈی پروڈکشنز اور آئی ایس پی آر کی اس مشترکہ پیشکش کو عوام کی جانب سے بے حد پذیرائی ملنے کے بعد ’عہد وفا‘ کی آخری قسط کو سینما گھروں میں دکھانے کا فیصلہ کیا گیا تھا اور 27 فروری کو سہ پہر 3 بجے ’عہد وفا‘ کی آخری قسط کا ٹریلر بھی جاری کیا گیا تھا۔

وطن کی مٹی سے کیے گئے عہد وفا کی داستان ڈرامہ سیریل ’عہد وفا‘ میں دوستی کے لازوال جذبے اور وطن سے محبت کو منفرد انداز میں پیش کیا گیا ہے۔

یہ بھی پڑھیں: ’عہد وفا‘ کی آخری قسط سینما گھروں میں دکھانے کا اعلان

اس غیرروایتی ڈرامے کے اچھوتے موضوع، جاندار اداکاری اور سماجی حقائق کی عکاسی نے عوام میں اس ڈرامے کی مقبولیت کو چار چاند لگا دیے۔

سینما گھروں میں ’عہد وفا‘ کی آخری قسط  14 مارچ 2020 کو دکھائی جائے گی جب کہ ٹی وی کے ناظرین 15 مارچ کو اس ڈرامے کی آخری قسط دیکھ سکیں گے۔

متعلقہ خبریں

ٹاپ اسٹوریز