دبئی : یوم پاکستان کے پرمسرت موقع پردنیا کی بلند ترین عمارت برج خلیفہ پاکسان کے قومی پرچم سے سج گئی۔
خبررساں ایجنسی کے مطابق متحدہ عرب امارت کی جانب سے 23 مارچ کے تاریخ ساز موقع پر پاکستان اور پاکستانیوں سے اظہار یکجہتی کرنے کے لیے برج خلیفہ پہ قومی پرچم کی بہار آگئی۔
دبئی سے شائع ہونے والے مؤقر انگریزی اخبار ’گلف نیوز‘ نے اس حوالے سے خبر و تصویر شائع کرنے کے علاوہ سماجی رابطے کی ویب سائٹ ’ٹوئٹر‘ پر وڈیو بھی جاری کی۔
The Burj Khalifa lit up with the Pakistani flag on the occasion of the 79th National Day of the South Asian country pic.twitter.com/c061FYJD02
— Gulf News (@gulf_news) March 23, 2019
خبررساں ادارے کے مطابق برج خلیفہ عمارت کے درمیان میں پاکستانی پرچم میں موجود چاند ستارہ بھی بنا ہوا دکھائی دے رہا تھا اوراپنی دلکشی سے سامعین پہ سحر طاری کررہا تھا۔
برج خلیفہ کے سحر کو دیکھنے کے لیے پاکستانیوں کے علاوہ وہاں دیگر ممالک کے لوگوں کا بھی جمگھٹا لگا ہوا تھا۔ اس موقع پر موجود پاکستانیوں نے یہ منظر دیکھ کر پاکستان زندہ باد کے نعرے لگائے تو کئی غیرملکیوں نے اظہار یکجہتی کے لیے ان کا ساتھ دیا۔
دبئی کا برج خلیفہ وزیر اعظم نیوزی لینڈ جسینڈا آرڈن کی تصویر سے بھی جگمگا اٹھا۔ عالمی خبررساں ایجنسی کے مطابق متحدہ عرب امارات نے برج خلیفہ پر جیسنڈا آرڈرن کی تصویر آویزاں کرکے انہیں خراج تحسین پیش کیا۔
سانحہ کرائسٹ چرچ کے بعد سے پوری دنیا میں جیسنڈا آرڈن کی قیادت کو زبردست خراج تحسین پیش کیا جارہا ہے۔
دلچسپ امر ہے کہ ترقی پذیر ممالک کی عوام کے ساتھ ساتھ دنیا کے سب سے زیادہ ترقی یافتہ کہلائے جانے والے ملک امریکہ میں بھی لوگوں نے اس خواہش کا اظہار کیا ہے کہ کاش! انہیں بھی نیوزی لینڈ کی وزیراعظم جیسی باہمت، انسان دوست اورہمدرد قیادت میسر آئے۔
عوام الناس کی خواہش کو پیش نظر رکھتے ہوئے مؤقر امریکی اخبارات واشنگٹن پوسٹ اورنیویارک ٹائمز نے گزشتہ روز کے اپنے اداریوں میں اس خواہش کا اظہارکیا کہ امریکہ کو بھی جیسنڈرا آرڈن جیسی قیادت مل جائے۔
سانحہ کرائسٹ چرچ کے بعد پوری دنیا کے ذرائع ابلاغ نے بلاامتیاز اپنی قیادتوں کو یہ مشورہ ضرور دیا کہ وہ اگر نیوزی لینڈ کی وزیراعظم جسینڈا آرڈن نہیں بن سکتے تو کم از کم ان کے نقش قدم پر ہی چل لیں۔
دبئی میں واقع دنیا کی بلند ترین عمارت برج خلیفہ پرنیوزی لینڈ کی وزیراعظم کی تصویر اس طرح لگائی گئی کہ وہ ایک متاثرہ خاتون کو گلے لگائے ہوئے دکھائی دے رہی ہیں۔
انسان دوستی کی اس تصویر نے وہاں موجود تمام افراد کی آنکھیں نمناک کردیں۔
New Zealand today fell silent in honour of the mosque attacks’ martyrs. Thank you PM @jacindaardern and New Zealand for your sincere empathy and support that has won the respect of 1.5 billion Muslims after the terrorist attack that shook the Muslim community around the world. pic.twitter.com/9LDvH0ybhD
— HH Sheikh Mohammed (@HHShkMohd) March 22, 2019
دبئی کے حکمران شیخ محمد بن راشد المختوم نے اس حوالے سے سماجی رابطے کی ویب سائٹ ’ٹوئٹر‘ پر جاری کردہ اپنے پیغام میں نیوزی لینڈ کی وزیراعظم سے اظہار تشکر کیا ہے۔
شیخ محمد بن راشد المختوم نے اپنے پیغام میں کہا ہے کہ نیوزی لینڈ کی وزیراعظم جسینڈا آرڈن کے خلوص، ہمدردی اور تعاون نے مسلمانوں کے دل جیت لیے ہیں۔
اپنے ٹوئٹر اکاؤنٹ پر نیوزی لینڈ کی وزیراعظم سے تشکر کا اظہار کیا،انہوں نے کہا کہ نیوزی لینڈ اور وزیراعظم جسینڈا آرڈن کے خلوص، ہمدردی اور تعاون نے مسلمانوں کے دل جیت لیے ہیں۔
